«Бақытты балалық шақты қамтамасыз ету – біздің, ересектердің басты міндеті. Осы орайда, міне, бірнеше жыл бойы қорымыз балалардың сенімді серігіне айналғанын айтқым келеді. Әсіресе ерекше балаларға қоғамда тең мүмкіндік жасау қажет», дейді «Samruk-Kazyna Trust» КҚ бас директоры Альфия Адиева.
Мәселен, қор осы жылы Балаларды қорғау күні «Samruk Charity Marathon» қайырымдылық марафонында краудфандинг тәсілін қолдану арқылы 1000-ға тарта азамат пен 30-дан астам компаниядан 126,7 млн теңге жинай алды. Нәтижесінде, жаңа оқу жылы елорданың 5 бірдей мектебінде инклюзияны қолдау кабинеттері ашылып, 150-ден астам ерекше бала қатарластарымен бірге мектепте оқып жатыр. Қор басшылығы қоғам мен бизнес өкілдерін алдағы уақытта да осындай бастамаларға белсенді үн қосуға шақырады.
Бұдан бөлек, қор қолдауымен, «Саламатты Қазақстан» медициналық пойызының жұмысы аясында өңірлерде 14 мыңнан астам жеткіншекке жоғары білікті дәрігерлер тегін әрі сапалы қызмет көрсетсе, саны 40-тан асқан оңалту орталығы да мүгедектігі бар балалар мен олардың ата-аналарына тұрақты қолұшын созып келеді. Жаз бойы танымдық, саяхат лагерьлері жұмыс істеп, өскелең ұрпаққа қажет білім, медицина, бұқаралық спорт, мәдениет саласындағы өзге де жобалар жалғасын тауып отыр.
