Биыл 100 жылдық мерейтойы республикалық деңгейде тойланып жатқан қазақтың ержүрек батыр ұлы, Берлиндегі Рейхстагқа алғаш болып жеңіс туын тіккен, Халық қаһарманы Рахымжан Қошқарбаевтың есімін ұлықтау мақсатында, ұлы тұлғаның туған күнімен орайластыра ұйымдастырылған конференцияның шымылдығын Ұлттық қорғаныс университетінің бастығы, PhD, доцент, генерал-майор Асқар Досбосынұлы Мұстабеков ашты.
– Қарулы күштерінің Бас қолбасшысы, Мемлекет басшысы Қасым-Жомарт Тоқаевтың «Egemen Qazaqstan» газетіне сұхбат бергенін бәріңіз білесіздер. Сол сұхбатта Мемлекет басшысы «Ел тарихында ерекше орны бар тұлғаларға құрмет көрсету дәстүрі еліміздің жалпы ұлттың бірегейлігін нығайта түсуге зор септігін тигізеді» деді. Ұлттың бірегейлігін сақтау үшін батырлар рухына құрмет көрсетіп, олардың көзсіз ерлігін кейінгі ұрпаққа насихаттау ісін үздіксіз жүргізе беруге тиіспіз. Бүгінгі іс-шара соның нақты мысалы бола алады, – деді Ұлттық қорғаныс университетінің басшысы.
Сондай-ақ Асқар Досбосынұлы конференция қонақтарын әйгілі ғалым Қаныш Сәтбаевтың туғанына – 125, даңқты батырлар Сағадат Нұрмағамбетов пен Рахымжан Қошқарбаевтың туғанына 100 жыл толуымен құттықтап, іс-шара барысында еліміздің әскери тарихына қатысты кең көлемдегі теориялық және тәжірибелік мәселелердің талқыланатынына сенім білдірді.
Қарулы Күштер Бас штабы академиясы жедел өнер және әскери тарих кафедрасының аға оқытушысы, PhD, запастағы полковник Дәурен Майхиев Екінші дүниежүзілік соғыстың соңғы нүктесін қоюда Берлиндегі шайқастың маңызын арнайы дайындалған көрнекі құралдармен деректерге сүйеніп баяндап шықты.
Баяндамада ғалым «Рахымжан Қошқарбаевтың Рейхстагқа ту тігу ерлігін ұрпақ санасына сіңіреміз десек, фашизмді түпкілікті талқандауда кеңес әскерінің қандай тәуекелдерге барғанын, Берлинді алу шайқасының адамзат тарихындағы мән-мағынасын тереңірек біліп алуға тиіспіз» деген ойын ортаға салды.
Мұнан кейінгі баяндамаларда Рахымжан Қошқарбаевтың Рейхстагқа ту тігу үшін 360 қадам жерді жеті сағат бойы қалай жылжығаны, Қошқарбаев қызмет еткен полктің жауынгерлік ерліктері, Халық қаһарманы туралы жазылған әдеби туындылар мен зерттеу еңбектердің әскери мамандарға әсері туралы көптеген мәселелер айтылды.
Сондай-ақ конференция барысында ғалымдар «Қазақстанның егемен мемлекет ретіндегі әскери заңнамасын жетілдіру» тақырыбында да өз ойларын ортаға салды.
Іс-шараға онлайн қатысқан Әуе қорғанысы күштерінің Әскери институты, Ұлттық ұлан академиясы, Сабыр Рахымов атындағы әскери колледж мамандары мен Ұжымдық қауіпсіздік шарты ұйымының өкілдері фашизмді талқандаудағы батырлардың ерлік істеріне ғылыми тұрғыда баға беру мәселесін күн тәртібінен түсірмеуді ұсынды.
Конференция соңында Ұлттық қорғаныс университетінің бастығы, генерал-майор, PhD Асқар Мұстабеков әскери мамандар мен ғалымдарға алғыс білдірді.
