- Футболдан ел чемпионатының бірінші лигасында алдына жан салмаған Көкшетаудың «Оқжетпесі» келесі маусымда Премьер-лигада өнер көрсетеді. Ал екінші орынға тартыс Жезқазғанның «Ұлытауы» мен Ақтаудың «Каспий» клубтары арасында өрбіп жатыр.
- Данияның Баллеруп қаласында велотректен әлем чемпионаты аяқталды. Өкінішке қарай, еліміздің спортшылары бұл жарыста сүреңсіз өнер көрсетті. Велошабандоздар арасынан ең үздік көрсеткішке Кирилл Курдиди қол жеткізді. Гит сайысында ол жетінші орын алды.
- Таиландтың Хуахин қаласында ұйымдастырылған WTA 250 турнирінде Ресей теннисшісі Ирина Хромачевамен жұптасып өнер көрсеткен Анна Данилина үздік деп танылды. Шешуші бәсекеде олар гонгконгтық Эдис Чун мен жапониялық Моюка Учижиманы жеңді. Есеп – 6:4, 7:5.
- Еліміздің ең танымал үстел теннисшісі Кирилл Герасименко Францияның Монпелье қаласында WTT Champions турниріне қатысып жатыр. Сонымен қатар аталған додада Уго Кальдерано (Бразилия), Лян Цзинкунь (Қытай), Лин Шидун (Қытай), Феликс Лебрун (Франция), Линь Гоаюань (Қытай), Томокази Харимото (Жапония), Лин Юн-Джу (Тайбэй), Данг Цю (Германия), Патрик Франциска (Германия), Трулс Морегард (Швеция) сынды сақа спортшылар бақ сынайды. Жарыс 27 қазанда аяқталады.
- 25-27 қазан аралығында Канаданың Монреаль қаласында шорт-тректен Әлем кубогінің кезеңдік сайысы өтеді. Одан кейінгі айлар да дүбірлі додаға толы. Ұлттық команданың бас бапкері Петр Гамидов аталған жарыстарда мына шәкірттеріне сенім артып отыр: Денис Никиша, Абзал Әжіғалиев, Еркебұлан Шамұханов, Әділ Ғалиахметов, Глеб Ивченко, Мерсаид Жақсыбаев, Айбек Нәсен, Ольга Тихонова, Яна Хан, Мәлика Ермек, Алина Әжіғалиева, Мадина Жанбосынова, Зейнеп Құмарқан.
- 2 қарашада Санкт-Петербургте аралас жекпе-жектен АСА турнирінің шымылдығы түріледі. Нева жағалауында өтетін жарыста жартылай жеңіл салмақтағы «Алаш Прайд» Гран-приінің жеңімпазы Бақдос Олжабай (16-4) да өнер көрсетеді. Қазақ файтері бұл кеште ресейлік Рустам Керимовпен (20-1) күш сынасады.
- Еуропадағы құны ең жоғары футболшылардың тізімі жарияланды. Бүгінгі таңда Эрлинг Холанд («Манчестер Сити») пен бразилиялық Винисиус Джуниордың өзгелерден көші ілгері. Олардың әрқайсысы 200 млн еуроға бағаланып отыр. Англиялық Джуд Беллингем мен француз Килиан Мбаппенің құны – 180 миллион. Кейінгі спортшылардың барлығы – Мадридтің «Реал» клубының жұлдыздары. Сондай-ақ үздіктер тізімінде мына аяқдоп шеберлері бар: Ламин Ямаль («Барселона») мен Фил Фоден («Манчестер Сити») – 150 млн, Букайо Сако («Арсенал») – 140 млн, Флориан Виртц («Байер»), Джамал Мусиала («Бавария»), Федерико Вальверде («Реал» Мадрид), Родри («Манчестер Сити») – 130 млн еуро.
