Мемлекет басшысы Жолдауында кемінде 100 мың IT-маман даярлау туралы айта келіп, жас, білімді әрі ынталы кадрларды қалыптастыру керектігін атап өткен еді. Тапсырмаға сәйкес Цифрлық даму, инновациялар және аэроғарыш өнеркәсібі министрлігі «Astana Hub» халықаралық технопаркімен бірлесіп, 2021 жылы 20 мың IT-кадр даярлауды көздейтін «Tech Orda» бағдарламасын іске қосты. Осылайша, мемлекеттің қолдауымен әр студентке 600 мың теңге бөлініп, жыл сайын 3 мыңнан астам IT-маман оқыту жоспарланды. Бұл бағдарламаның ерекшелігі – еліміздің 18 бен 45 жас аралығындағы барлық азаматына жасанды интеллект мүмкіндіктерін үйретіп, ІТ-мамандықты тегін оқытады.
Осы жылы «Tech Orda» бағдарламасына 3465 грант бөлінді, оның ішінде 2465-і негізгі лекке, ал 1000-ы мамандандырылған топтар аясында педагогтерге ұсынылды. Атап айтқанда, 300 грант мектеп мұғалімдерінің және 700 грант жоғары оқу орындарындағы оқытушылардың біліктілігін арттыруға берілді.
Бағдарламаның 2022 және 2023 жылдардағы нәтижелері білікті кадрларды даярлаудағы маңызын растайды. Бүгінде 91 мектеп 6251 студентті оқытты. Жобаға ірі қалалардың тұрғындары ғана емес, өңір тұрғындары да белсенді қатысып жатыр. Нақтырақ айтсақ, студенттердің 46%-ы еліміздің түрлі аймағынан жиналған. Бұл IT-білімді ұлттық деңгейде дамытуға ықпал етеді.
Биыл 79 отандық IT-мектеп пен 1 IT-компания аккредиттеуден өтіп, веб-бағдарлама әзірлеу, 3D-дизайн мен 3D AR/VR қосымшалар, киберқауіпсіздік пен IoT, жасанды интеллект, мобильді қосымшалар жасау, сондай-ақ «Big Data» мен «GameDev» сияқты өзекті бағыттар қамтылған 178 курс бойынша мамандар даярлау мүмкіндігіне ие болды.
Статистикаға сүйенсек, «Tech Orda» түлектерінің 88%-ы жұмысқа орналасқан. Соның ішінде «Kaspi.kz», «Halyk Bank», «KPMG», «Ernst&Young», «Теңізшевройл», «ҚазМұнайГаз», «Freedom Finance», «Kcell», «Air Astana», «Kolesa Group» сияқты ірі компанияларда қызмет атқарады.
Ал «Tomorrow School» – Николас Садирак әзірлеген «01 Edu» платформасында инновациялық «peer-to-peer» оқыту жүйесін пайдаланатын бірегей жасанды интеллект мектебі. Аталған мектеп бағдарламалау дағдыларын нөлден бастап үйретеді. Мұндағы оқыту студенттердің өзара көмегі мен топтық жұмысына негізделген, яғни мұғалімдер мен дәстүрлі сабақтар болмайды. Одан бөлек, барлық студенттің Астана қаласындағы «Astana Hub» технопаркі алаңында офлайн форматта тегін оқу мүмкіндігі бар. Мектеп тәулік бойы (24/7) жұмыс істейді, студенттер өздеріне ыңғайлы оқу кестесін құрады.
Іріктеу үміткерлердің логикалық ойлау деңгейін тексеретін 2 онлайн ойыннан және «бассейн» деп аталатын оқытудың кіріспе кезеңіне тікелей қатысуды көздейтін бөлімнен тұрады. Бірінші «бассейн» 17 қарашаға дейін өтеді, мұнда қатысушылар бағдарламалау әлеміне тереңірек бойлап, оқуды жалғастыру үшін өз мүмкіндігін бағалайды. Іріктеуден өткеннен кейін қатысушылар 18 айлық негізгі оқытуға көшеді. Бұл кезеңде олар 50-ден астам жобаны жүзеге асырып, «Golang», «Rust», «JavaScript», «Python» және басқа да 20-дан астам бағдарламалау тілін меңгереді. Соңғы кезеңде қатысушылар ЖИ-инженері, бағдарламалық қамтамасыз етуді дайындаушы, мобильді қосымшалар әзірлеушісі, DevOps инженері, IT жүйелерінің сәулетшісі, киберқауіпсіздік маманы және бейнеойындар әзірлеушісі сынды мамандықтардың бірін таңдайды.
