Қазақстан Жазушылар одағының Атырау облысы бойынша өкілі Әлия Дәулетбаеваның айтуынша, «Атырау толқындары» деп аталатын жобаға жергілікті әкімдік қолдау білдіріп отыр. Қыркүйек айында ұлт руханиятын байытуға мол үлес қосқан он қаламгердің аудиокітабы шыққан.
Бұл жоба аясында белгілі ақын-жазушылардың туындылары аудиокітап түрінде Яндекс порталының «Яндекс-кітаптар» платформасына жүктеледі. Аталған порталмен 5 жылға келісімшарт жасалыпты.
«Жыл соңына дейін 30-ға жуық аудиокітапты «Яндекс-кітаптар» платформасына жүктеу көзделіп отыр. Аудиокітапқа қаламгерлердің ең таңдаулы туындылары іріктелді. Оның ішінде XV ғасырдағы жорық жырауы Қазтуған Сүйінішұлының, алдаспан жырдың ақберені Махамбет Өтемісұлының, зар заман ақыны Мұрат Мөңкеұлының шығармалары бар. Бұл лекте өмірден ерте өткен Марат Отаралиевтың, поэзиядағы өзіндік үнімен ел жадына жатталған Фариза Оңғарсынованың туындыларының аудионұсқасы жазылды. Екінші дүниежүзілік соғыстан кейін ақша бұлт ақын атанған Әбу Сәрсенбаев, «Жаман Жәутік» романымен оқырман ықыласын аударған Есенжол Домбаев қалдырған туындылардың аудиокітабы оқырман ықыласын тудыратыны даусыз», дейді Әлия Дәулетбаева.
Сондай-ақ өнер зерттеушісі, композитор, Қазақстанның Еңбек Ері Илья Жақановтың, танымал қаламгер Марат Мәжитовтің, Қазақстан Жазушылар одағының басқарма төрағасы Мереке Құлкеновтің, Нұрлан Қами шығармаларының аудионұсқасы кәсіби студияда жазылған. Бардтық өнерді кеңінен насихаттаған Табылды Досымов пен жас қаламгер Бақытгүл Сәрмекованың шығармаларының аудионұсқасы бар.
«Аудиокітапқа тек көркем шығармаларды енгізумен шектелмейміз. Алдағы уақытта публицистикалық, танымдық туындыларға назар аударылады. Аудионұсқадағы осындай шығармаларды оқырманға ұсынуды жоспарлап отырмыз», деді Ә.Дәулетбаева.
Атырау облысы
