Алдымен Ақтау қаласындағы Достық үйі ғимаратының фойесінде біртуар әртіс Алмас Бекбосыновтың туғанына 100 жыл толуына арналған халықаралық би фестивалі аясында әртістің өмірі мен қызметін баяндайтын арнайы жасақталған көшпелі көрменің ашылуы болды. Би әлемінен сыр шерткен көрменің лентасын қию мәртебесі Қазақстанның халық әртісі Гүлжан Талпақоваға және Алмас Бекбосыновтың туысы Сара Бекбосыноваға беріліп, көрмені таныстыру Мәдениет саласының үздігі Серік Сариевке ұсынылды.
Қазақтың өнер көкжиегіндегі жарық жұлдызы, тұңғыш қазақтың ұлттық-сахналық биімен бірге классикалық жанрды насихаттаушы, биші, балетмейстер, режиссер Алмас Бекбосыновтың шығармашылығына арналған шара өнерпаздың өмірі мен шығармашылығына арналған деректі фильм көрсетілімімен жалғасты.
Ұлттық би өнерінің дамуына байланысты азаматтардың қатысуымен ұйымдастырылған дөңгелек үстелге сарапшылар, құрметті қонақтар, қала, аудандардағы хореографтар қатысты. Дөңгелек үстел жеке орындаушылық жанр және оның аспектілеріне арналды. Жеке орындау жанры бойынша сарапшылар мен келген қонақтар ойларымен бөлісіп, қорытындысы бойынша шешім қабылданды.
Бұл іс-шаралардан соң Қазақстанның еңбек сіңірген әртісі Алмас Бекбосыновтың туғанына 100 жыл толуына арналған халықаралық би фестивалінің ашылу салтанаты өтті.
«Сіз бен біз бүгін ерлердің арасынан шыққан тұңғыш кәсіби балет бишісі Алмас Бекбосынов туралы тың туындыны тамашаладық. Кенен Әзірбаевтай тұлғаны тудырған топырақтан жаралған Алмас Бекбосыновтай тума таланттың өмір жолы және шығармашылығымен таныстық. Қазақ классикалық би өнерін биікке шығарған, небәрі 50 жыл өмір сүріп, актерлік шеберлігімен елден ерек болған Алмастай тұлғаның рухын құрметтеп, біздің шақыруымызды қабыл алып, іс-шараның ойдағыдай өтуіне қолдау көрсеткендеріңізге алғыс білдіремін» деген Маңғыстау облысы әкімінің орынбасары Т.Әбішев фестиваль жұмысына сәттілік тіледі.
Би фестивалі аясында қазылар алқасы мүшелерінің фестиваль қатысушыларына, кәсіптік оқу орындарының студенттері мен Маңғыстау облысы би ансамбльдерінің әртістеріне шеберлік сабағын өткізді. Фестиваль ережесі бойынша қатысушылар екінші кезеңде өзге ұлт биін билеп сынға түскен болатын.
Фестиваль қорытындысы бойынша қазылар алқасы үздік деп таныған қатысушыға өз аттарынан арнайы жүлделер белгілеп, Қазақстанның халық әртісі, қазақтың би өнерін әлемнің 52 мемлекетіне танытқан өнер иесі Г.Талпақова, ҚР білім беру ісінің құрметті қызметкері, Мәдениет саласының үздігі, «Ерен еңбегі үшін» медалінің иегері Ғ.Бейсенова, Қазақстанның еңбек сіңірген әртісі, өнертану кандидаты, профессор, «Ы.Алтынсарин», «Халық алғысы» төсбелгілерінің, «Ерен еңбегі үшін» медалінің иегері Т.Ізім, Мәдениет қайраткері, педагогика ғылымдарының докторы, профессор А.Құлбекова, Қазақстанның еңбек сіңірген әртісі, «Еңбек даңқы» төсбелгісінің иегері Ғ.Әбдиева, Мемлекеттік «НАЗ» би театрының директоры, Хореография өнері қайраткерлері қоғамының төрағасы, Мәдениет қайраткері Е.Ағымбаев, Мәдениет қайраткері, «Ерен еңбегі үшін» медалінің иегері Т.Қылышбаев, Қазақстанның еңбек сіңірген қайраткері, педагогика ғылымдарының кандидаты З.Әжібекова, Қазақстанның еңбек сіңірген қайраткері, «Құрмет» орденінің иегері Ә.Есекеев атынан сыйлықтар табысталды.
ТҮРКСОЙ халықаралық ұйымының арнайы жүлдесін ТҮРКСОЙ халықаралық ұйымының режиссері А.Нұрмұхамедұлы Атырау облысынан келген өнерпаз Қаракөз Мұрат, маңғыстаулық Есдәулет Амангелдіұлы, Ақмола облысынан келген Камила Бекмұханбетоваға табыстады.
«Жақсының аты өлмейді» дегендей, өмірден өтсе де өнердегі ізі өлмеген тұлғаға арналған ауқымды іс-шара арқау болып, талай талантты жастың мерейін тасытты. Бұл, яғни Алмас Бекбосыновтың есімін жаңғырту – қазақтан шыққан бишілердің тағдыры мен тәлімін түгендеп, тірілтіп жүрген биші жігіт Серік Сариевтің кезекті жобасы.
Маңғыстау облысы
