Ең алдымен елші «ÖzgeEpic» кітапханасын аралады. Өнер кеңістігіндегі кітап қорына ерекше назар аударып, 300-ге жуық қазақ тіліндегі кітапты тарту етті. Елшінің назарына «Аспан жылқылары» көрмесі ұсынылды. Бұл – ұлттық құндылықтарды дәріптейтін бағалы коллекция ХІХ–ХХІ ғасырлар аралығындағы ат әбзелдерін негіз еткен бірегей жәдігерлер топтамасы. Сол үшін де ұлттық нақыш пен заманауи көркемдік шешім елшінің жоғары бағасына ие
болды.
Кездесу барысында елші этно-мұражаймен де танысты. Мұнда қазақтың қолөнер түрлері мен туындылары көрсетілді. «ÖzgeEpic» креатив хабының жетекшісі Тоғжан Құрманжанқызы АҚШ елшісіне қазақтың ұлттық мәдениетінің маңызын түсіндіріп, сый ретінде асық топтамасын тарту етті. Сонымен бірге Осман мұрағаттарынан табылған қазақ хандары мен Осман сұлтандары арасындағы дипломатиялық құжаттардың түпнұсқа көшірмелері таныстырылды. Олардың тарихы мен дипломатиялық маңызы елшінің ерекше қызығушылығын туғыз-
ды.
Кездесу барысында АҚШ дипломатына таныстырылған келесі жоба – білімді тұрақты дамыту қорымен бірлесе жасалған «Ауыл мектебі» фотокөрмесі. Бұл жоба – ауыл мектептерінің дамуы мен олардың жергілікті қоғамға тигізген әсерін бейнелейтін әлеуметтік жоба. Іс-шара соңында Дэниел Розенблюм мырза «ÖzgeEpic» қабырғасына естелік ретінде өз лебізін қалдырды. Елші мырзаның бұл сапары екі ел арасындағы мәдени диалогтің маңызын көрсетті.
