Фото: egemen.kz| Ерлан Омар
Тиісті заңдар еліміздің әлеуметтік-экономикалық даму болжамын, Мемлекет басшысының тапсырмаларын негізге ала отырып әзірленген.
2025 жылы кіріс 15,6 трлн, 2026 жылы – 16,7 трлн, 2027 жылы – 18,2 трлн теңге болады деп болжанып жатыр. Шығындар сәйкесінше 25,8 трлн, 23,2 трлн және 24,6 трлн теңге болмақ. Бұл ретте Ұлттық қордан кепілдендірілген трансферттердің көлемі жылына 2 триллион теңгені құрайды.
Республикалық бюджет шығыстарының 68 пайыздан астамы Қазақстан Республикасының 2029 жылға дейінгі Ұлттық даму жоспарында, ұлттық жобаларда, тұжырымдамаларда, даму жоспарларында және басқа да құжаттарда белгіленген стратегиялық мақсаттары мен нысаналы индикаторларын іске асыруға бағытталған.
Заң жобалары жөніндегі жұмыс топтарының жетекшісі Еркін Әбіл қосымша баяндамасында бюджет жобасында тұтастай алғанда экономиканың тұрақты өсуі (орта есеппен жылына 5,4%-ға) болжанғанын атап өтті. Оның ішінде, өңдеу өнеркәсібі (5,8%), құрылыс (9,3%), ақпарат және байланыс (9,5%) өсу қарқыны сынды жекелеген салалар бар.
Бюджет жобасы мемлекеттiң барлық әлеуметтiк мiндеттемесінiң орындалуын, соның iшiнде мемлекеттiк қызметшiлердiң жалақысын, зейнетақы мен стипендияны кезең-кезеңiмен арттыруды қамтамасыз етедi.
