Сурет: olympic.kz
Сессияға әлемнің түкпір-түкпіріндегі Олимпиадалық қозғалыстың 288 ұйымы, оның ішінде 200 ҰОК, Халықаралық Олимпиада комитеті делегаттары, Халықаралық федерациялар мен Олимпия ойындарын ұйымдастыру комитеттерінің өкілдері қатысып жатыр. Еліміздің атынан Португалияға Ұлттық Олимпиада комитетінің президенті Геннадий Головкин мен ҰОК бас хатшысы Әлімжан Ақаев барды.
ҰОКҚ Бас Ассамблеясының мақсаты тікелей диалог арқылы сессияға қатысушылар арасындағы ынтымақтастықты нығайту болып саналады. Ассамблея жұмысы барысында қауіпсіз спортты дамытуға арналған тиімді стратегиялар, ҰОК-тің болашағы, олимпиада бағдарламасындағы эволюция сынды тақырыптарға көңіл бөлініп, спорт саласында жасанды интеллект құралдарын пайдаланудың болашақтағы рөліне баға берілді.
ҰОКҚ Бас Ассамблеясы аясында Геннадий Головкин Біріккен күрес әлемі (UWW) басшысы Ненад Лаловичпен, Халықаралық гимнастика федерациясының президенті (FIG) Моринари Ватанабэмен, Халықаралық ауыр атлетика федерациясын (IWF) басқаратын Мохаммед Джалудпен, Түркия, Франция Ұлттық Олимпиада комитеттері президенттерімен, өзге ҰОК өкілдерімен кездесті.
