Жаңа катер теңіздегі мемлекет шекарасын, елдің біртұтастығын қорғауға қызмет етеді. Қорғаныс министрінің орынбасары жауынгерлер катері өңірдің теңіз әлеуетінің қарқынды дамып жатқанын аңғартатынын мәлім етті.
– Президент Жолдауында айтылғандай, жаһандық әскери техника өндірісі дамыған мемлекеттердің ұлттық қорғаныс жүйесінде шешуші рөл ойнайды. Қазіргі заман – жаңа технология заманы. Бұл катер – Отанымыздың инженерия саласының жоғары деңгейінің айқын дәлелі, – деді С.Қамалетдинов.
Өңір басшысы Нұрдәулет Қилыбай тарихи оқиғаның ғалымдардың төккен тері мен еңбегінің нәтижесі екенін айтты.
– Мемлекет басшысы Қасым-Жомарт Тоқаев қазақ құрылыс индустриясын дамыту, тереңдету қажет деп бағыт-бағдар берген еді. Міне, нәтижесін, жемісін көріп отырмыз. Өңірімізде жасалған отандық өнім ел тыныштығын күзетіп, теңіз әскерлерінің нәтижелі қызмет етуіне көмектеседі. Осы жобаны жүзеге асырған азаматтарға, мамандарға, құрылысшыларға көп рахмет айтамын. Азаматтар өздерінің шеберліктерін дәлелдеді, – деді облыс әкімі.
Жаңа катерді құрастырған «Кеме жабдықтары және сервис» ЖШС-ның директоры Дмитрий Донскойдың айтуынша, серіктестіктің тек қорғаныс саласында емес, азаматтарға арналған, туризм, транспорт бағытында, төтенше жағдайлар кезінде қолданылатын техникаларды да жасауға мүмкіндіктері бар.
Маңғыстау облысы
