- Футболдан Қазақстан Премьер-лигасының 25 турындағы ең қызықты ойын Петропавловскіде өтті. Бұл матчта жергілікті «Қызылжар» Қызылорданың «Қайсарын» 6:2 есебімен ұтты. Бәсеке барысында Кот-д’Ивуардан келген легионер Сенин Себаи хет-трик жасады. Ал басқа кездесулердің нәтижелері мынадай: «Қайрат» – «Ордабасы» 2:1, «Шахтер» – «Ақтөбе» 1:3, «Тұран» – «Жеңіс» 1:1, «Жетісу» – «Атырау» 0:2, «Тобыл» – «Астана» 1:0.
- Жартылай орта салмақтағы Шавқат Рахмонов (18-0) 7 желтоқсанда АҚШ-тың Лас-Вегас қаласында UFC-дің чемпиондық атағы үшін америкалық Белал Мұхаммадпен (24-3) күш сынасуға тиіс еді. Алайда бұл жекпе-жек өтпейтін болды. Оның себебі – чемпионның «сүйек инфекциясы» дертіне душар болуы.
- Футзалдан Чемпиондар лигасының элиталық кезеңінің жеребесі тартылды. «Қайрат» В тобына түсті. Алматылықтар «Олмиссум» (Омиш, Хорватия), «Этуаль» (Лаваль, Франция), «Динамомен» (Загреб, Хорватия) шеберлік байқасады. Бұл бәсекелер 26 қараша мен 1 желтоқсан аралығында Загребте өтеді. D тобындағы «Семей» «Пальма» (Испания, Пальма-де-Майорка), «Рекорд» (Бельско-Бяла, Польша), «Лученецпен» (Словакия) сайысқа түседі.
- Словакияның Сенец қаласында үстел теннисінен WTT Youth Contender турнирі аяқталды. 11 жасқа дейінгі ойыншылар арасындағы бәсекеде Жания Бекмұхамбетова бас жүлдені жеңіп алды. Осы жарыс барысында ол Александра Бец (Украина), Юлия Вчелкова (Словакия), Селестина Капати (Сингапур), София Трускова (Словакия), Эмили Ву (Швейцария), Аялгуу Эрденехуяг (Моңғолия) сынды спортшыларды ұтты.
- Францияның Анже қаласында мәнерлеп сырғанаудан Гран-при турнирі аяқталды. Бұл жарыста жерлесіміз Михаил Шайдоров төртінші орынды қанағат тұтты. Ол 231,86 ұпай жиды. Бас жүлдені америкалық Эндрю Торгашев (233,64) олжаласа, күміс пен қола медальды жапониялық Коширо Шимада (233,84) мен франциялық Адам Сяо Хим Фа (246,58) иеленді.
