«Halyk Academy» зертханасы

Жаңа буын мамандарын даяр­лауға арналған зертхана банк және қаржы саласында теориялық білім мен тәжірибе алуға мүмкіндік бере­тін кәсіби алаңға айналмақ.

Әл-Фараби атындағы Қазақ ұлт­тық университетінің бірінші проректоры Еркін Дүйсенов әріптестік негізде ашылған зертхана туралы айта келіп: «Бұл – өз кезегінде студент жастардың университетте алып жатқан теориялық білімін практикамен ұштастыруға берілген бірегей мүмкіндік. Зертханада студенттер қаржы саласында білім мен әртүрлі дағдыны меңгеріп, болашақта табысты жұмыс істейді деп сенімдемін. Сондықтан «Халық банкімен» әріптестігіміз әрі қарай нығая береді», деді проректор.

Өз кезегінде «Қазақстан халық банкі» АҚ басқарма төрағасының орынбасары Дәурен Сартаев: «Қазақстанның жетекші жоғары оқу орындарының бірі – Әл-Фараби атындағы ҚазҰУ-да студенттерге арналған зертханамыздың ашы­луы – біз үшін үлкен мәртебе. Бүгін­де ақпараттық технологиялар фа­культетінің түлектері әртүрлі салада қызмет етіп, өз біліктіліктерін көрсетіп отыр. Оған дәлел – біздің «Халық банктің HR» директоры Индира Аширова осы факультеттің түлегі, өз саласының кәсіби маманы. Сондықтан да факультет математика, қаржы, IT саласының мықты іргетасы қаланған үлкен мектеп болып қала береді», деді ол.

Бүгінде «Қазақстан халық банкі» АҚ Әл-Фараби атындағы ҚазҰУ-дың негізгі серіктесі ғана емес, сонымен қатар бакалавриат, магистратура және докторантура деңгейлерінде «Деректер туралы ғылым/Data Science» білім беру бағдарламасының бірлескен құрастырушысы және жұмыс беруші саналады. Бұл әдіс оқу бағ­дар­ламасы мен кәсіби стан­­дарт­тардың үйлесімділігін қам­тама­сыз етіп, түлектерге мансап­тық қадам­дарға жол ашып, деректер базасымен жұмыс істеуге мүмкіндік береді.

«Halyk Academy» бағдарламасы аясында студенттерге банк сарап­шыларының дәрістері, ашық есік күндері, сондай-ақ индустрияның заманауи талаптарын ескере отырып, әзірленген банк мамандықтары бойынша курстар өтетін болады. Со­нымен қатар академия аясын­­д­а ғылыми зерттеулер мен техноло­гиялық әзірлемелерді (R&D) дамыту жоспарланып отыр. Бұл студент­тер мен оқытушыларға қаржы са­ла­сындағы инновациялардың да­муы­на ықпал ететін өзекті жобалар­мен жұмыс істеуге мүмкіндік береді.

АЛМАТЫ