Сурет: ortcom.kz
Оны іске асыруға білім саласын тұрақты дамыту қорымен қатар өңірдің ірі компаниялары қатарынан демеушілер қатысады. Назарбаев зияткерлік мектептері мен «Білім-инновация» лицей-интернаттары жобаға қатысу үшін іріктелген 50 мектептің озық тәжірибесін және әдістемесін бөліседі.
NCOC, «ҚазМұнайГаз» АҚ және «Халық» жеке қайырымдылық қоры мектептерді жарақтандыруға қолдау көрсетті. Демеушілер қатарында 60 оқу сыныбын жарақтандыруға қатысқан «Ordabasy Group» компаниясы бар.
«Отпан» сынды жобаларды қолдау арқылы біз ертеңгі күннің міндеттерін шешуге қабілетті білікті мамандарды тәрбиелеу үшін қолайлы жағдай жасаймыз. Білім мекемелерін жаңғырту және педагогтер біліктілігін арттыру балаларымыздың ең жақсы білім ресурстарына қол жеткізуіне жол ашады. Осы бастаманың бір бөлігі болып, еліміздің зияткерлік капиталын дамытуға үлес қосуға қуаныштымыз», дейді «Ordabasy Group» компаниясы басқарма төрағасының кеңесшісі Жармұхамед Аппаз.
Сонымен қатар Тамара Дүйсенова Ақтаудағы «Отпан» жобасына енгізілген екі мектептің қызметімен танысты. Оның шеңберінде №15 және №29 мектептерде материалдық-техникалық база күшейтілді. Мұғалімдер үшін оларда әртүрлі тақырыптық курс пен семинарлар ұйымдастырылады.
«Облыс әкімдігі мектептердің жөндеуіне жауапты болды. Ал демеушілер пәндік кабинеттерді жабдықтады. «Отпан» жобасы ұстаздар мен оқушыларға сапалы білім ісін ұйымдастыруда жақсы мүмкіндік туғызып жатыр. Бұл білім ошақтары кейін өзге де орта білім мектептері үшін тірек мекемелері болмақ», деп атап өтті Тамара Дүйсенова.
Оқушылардың ата-аналары да кабинеттерді жабдықтауға қаражат бөлген демеушілерге алғыс білдірді. Сапар аясында өңір мектептері басшыларының қатысуымен кеңес ұйымдастырылды. Оған өңір басшысы Нұрдәулет Қилыбай қатысты. Кездесу барысында өңірдегі орта білімді дамыту мәселелері талқыланды. Жұмыс сапары кезінде Тамара Дүйсенова облыс орталығындағы «Балбұлақ» балабақшасы жұмысымен танысты. 300-ден астам бала оқитын мекемеде Монтессори, логопед, психолог кабинеттері бар. Балабақшада мектепке дейінгі білім мәселелері бойынша кеңес өтті.
Өңірде бастауыш мектеп пен балабақша бағдарламаларын синхрондау жұмыстары жалғасып жатыр. Мектепке дейінгі білім мекемелерімен қамтылмаған балалардың ата-аналары үшін консультациялық орталықтар жұмыс істейді. Бұл жұмыс Маңғыстау облысының 169 балабақшасында қолға алынған.
Мектепке дейінгі білім мекемелерін цифрландыру да басты назарда. Кездесу барысында Тараз қаласында қанатқақты режімде іске асырылатын қаржыландырудың ваучерлік әдісін енгізу нәтижелері таныстырылды. Аталған жүйе талаптарға сай келетін барлық балабақшаны бюджеттік қаржыландыруға мүмкіндік берді. Ата-аналар мектепке дейінгі білімді ұйымдастыруды таңдауға мүмкіндік алды, ашықтық есебінен бюджет қаражатын үнемдеу жүріп жатыр.
«Жүйе өзінің тиімділігін көрсетіп отыр. Ваучерлік қаржыландыру әдісі Шымкент және Түркістан қалаларында енгізіліп жатыр. Ата-аналар мен балалардың мүддесіне сай келетін жүйе барлық өңірде енгізілуге тиіс», деді Тамара Дүйсенова.
Мемлекет басшысы келер жылды жұмысшы мамандықтары жылы деп жариялады. Осы орайда елдегі техникалық және кәсіптік білім саласын трансформациялау міндеті тұр. Қазір колледждерді бейіндеу жұмысы жүргізіліп жатыр. Негізгі мақсат – кәсіптік білім нысандарын ең алдымен өңірлер сұранысына қажетті кадрларды даярлау орнына айналдыру.
Жұмыс сапары аясында вице-премьер Маңғыстау туризм колледжіне де барды. Онда дуальды оқыту жобасын пайдалана отырып, қызмет көрсету саласына мамандар даярланады. Колледж түлектерге жұмысқа орналасу үшін жағдай жасап, ірі кәсіпорындармен, жергілікті және шетелдік қонақүйлермен белсенді жұмыс істейді. Колледж базасында оқу орындары басшыларының қатысуымен техникалық және кәсіптік білім саласына қатысты мәселелер талқыланды. Қазір кадрларды даярлауды 26 оқу орны жүргізеді. Түлектердің жұмыспен қамтылу көрсеткіші 72 пайызға жуықтайды. Облыстағы тірек колледждері айқандалып, өзара тәжірибе алмасу ісі қолға алынған.
«Техникалық және кәсіптік білім бағытында бірқатар шара қолға алынды. Колледждердің жұмыс сапасына қатысты бағалау жүргізіліп, оларды лигаларға жіктеу қарастырылған. Оқу үдерісіне халықаралық стандарттарды енгізу қажет. Бұл даярланатын мамандардың бәсекеге қабілеттілігін арттыру үшін керек. Халықаралық салалық стандарттарды енгізген, түлектердің басым бөлігі сертификатталған және орташа есеппен жоғары мөлшерде еңбекақы алатын колледждерге ынталандырушы төлемдер қарастырылады», деді Тамара Дүйсенова.
Үкімет басшысының орынбасары 420 оқушы білім алатын Ақтау халықаралық мектебіне де бас сұқты. Оқытушылардың 80 пайызы – еліміздің әр аймағынан келген жоғары білікті педагогтер. Облыста «Жайлы мектеп» ұлттық жобасы аясында 12 600 орындық 13 орта оқу орнын салу жоспарланған. Желтоқсан айында әрқайсысы 1 200 орыннан тұратын 3 нысан пайдалануға беріледі. Қазір ғимараттарда әрлеу жұмыстары жүргізіліп жатыр.
