Маусым қорытындысында үздіктер санатына енген еліміздің бірінші, әлемнің бесінші ракеткасы Елена Рыбакина «күлгін» тобында ойнады. Жылды жақсы табыспен бастағанымен, жарақат алуына байланысты біраз турнирге қатыса алмай, ойын тәжірибесінен қол үзіп қалған, оның үстіне бес жыл бойы жаттықтырып келген бапкерімен қош айтысқан Елена тұсаукесер кездесуінде Жасмин Паолиниге (Италия) 6:7, 4:6 есебімен есе жіберген еді. Келесі бәсекеде Чжан Цинвэньнен (Қытай) ұтылды – 6:7, 6:3, 1:6. Соңғы сайыста әлемнің бірінші ракеткасы Арина Соболенкоға (Беларусь) сан соқтырды – 6:4, 3:6, 6:1. Дегенмен бұл жеңіс жерлесіміздің жартылай финалға шығуына жеткіліксіз болды.
«Қызыл сары» топта Ига Швентек (Польша), Кори Гауфф (АҚШ), Джессика Пегула (АҚШ), Барбора Крейчикова (Чехия) шеберлік байқасты. Топтық кезеңде алғашқы екі орынды иеленген бұрымдылар енді жартылай финалда сайысқа түседі.
Ал ерлер арасындағы АТР-дің қорытынды турнирі 10 қарашада басталады. Янник Синнер (Италия), Александр Зверев (Германия), Карлос Алькарас (Испания), Даниил Медведев, Андрей Рублёв (Ресей), Тейлор Фриц (АҚШ), Каспер Рууд (Норвегия), Алекс де Минор (Аустралия) сынды саңлақтар бір апта бойы Италияның Турин қаласында өзара күш сынасып, ең мықтыны анықтайды.
