Іс-шараға ҚХА төрағасының орынбасары Марат Әзілханов, ҚХА Ғылыми-сарапшылық кеңесінің төрағасы, Қолданбалы этносаяси зерттеулер институты директорының орынбасары Айгүл Сәдуақасова, Қазақстан қоғамдық даму институты басқарма төрағасының орынбасары PhD Олжас Бейсенбаев, Л.Н. Гумилев атындағы Еуразия ұлттық университетінің доценті, әлеуметтанушы Эльмира Отар, әлеуметтану ғылымдарының докторы, Президент жанындағы ҚСЗИ бас ғылыми қызметкері Айгүл Забирова, ҚХА Ғылыми-сарапшылық кеңесінің және өңірлік Ғылыми-сарапшылық топтардың мүшелері қатысты.
Басқосуда алдымен сөз алған Марат Әзілханов жас ғалымдардың этносаралық келісімді нығайтудағы және Ассамблеяның ғылыми-сарапшылық әлеуетін дамытудағы маңызды рөліне тоқталды. Сонымен бірге спикерлер Олжас Бейсенбаев, Эльмира Отар және Айгүл Забирова этносаралық қатынастардың өзекті мәселелерін зерттеуге, жастар арасында құндылық бағдарларын қалыптастыруға бағытталған Жас ғалымдар клубының жобаларын таныстырды.
Олжас Бейсенбаев Жас ғалымдар клубы қоғамдық келісім мен жалпыұлттық бірлігін нығайтуға септігін тигізетін ғылыми жобалар бойынша пікір алмасу және ынтымақтастық алаңына айналатынын атап өтті. Үміткерлер санатына басқа гранттарға қатыспайтын және материалдық ынталандыруды қажет ететін ғылыми зерттеу институттары мен жоғары оқу орындарында қызмет атқаратын ғалымдар кіретінін айтты.
Ал әлеуметтанушы Эльмира Отар ғылыми әзірлемелерді тәжірибеге енгізудің маңызын атап өтіп, кешенді зерттеулер жастар арасында отансүйгіштік пен азаматтық жауапкершілікті қалыптастырудың тиімді тәсілін әзірлеуге көмектесетінін жеткізді. Сондай-ақ клуб жұмысы аясында Қазақстан халқы Ассамблеясы елдегі этносаяси және мәдениетаралық үдерістердің дамуына үлес қосатын жас зерттеушілермен байланыс орнатуына ықпал етеді. Айгүл Забирова Қазақстан жастарының құндылықтары, қазіргі кезеңдегі елдегі азаматтық қоғамның даму үрдістері мен үдеріс мәселелерін көтерді. Сонымен қатар отырыс барысында ҚХА Ғылыми-сарапшылық кеңесінің мүшелерінің ротациясы мәселелерін де талқылады. Жиынға қатысушылар кеңестің тиімділігін арттыру, қазіргі заманғы сын-қатерлерге бейімделу үшін оның құрамын жаңартудың қажеттілігі туралы ортақ пікірге келді. Отырыс қорытындысында ұсынылған жобаларды іске асыру бойынша нақты қадамдар белгіленді.
