– «Isker talks» жобасының мақсаты қандай?
– Ақпараттық технологиялар сағат сайын дамыған заманда бұрынғы құндылықтар жүйесін сақтап қалу соншалықты қиындай түсті. Әсіресе жас буын тәрбиесінде жіберіп алып жатқан кемшіліктеріміз бары белгілі. Президент Қасым-Жомарт Тоқаев қоғамға жаңа сын-қатерлердің қаупі төнген кезде зиялы қауымға үлкен үміт пен жауапкершілік артылатынын бекер атап өткен жоқ. Мемлекет басшысының «Ұлт тағдыры сынға түскен сәтте көзі ашық азаматтар әрдайым көш бастаған. Адасқанға жөн сілтеп, жастарға бағыт-бағдар берген. Ел ағалары бірауыз сөзбен тентегін тыйып, тектісін төрге оздырған. Біз қанымызға сіңген осы қасиеттен айрылмауымыз керек» деген сөзі ел тірегі болашақ ұрпақ десек, адамгершілік, әділдік, парасат сынды қасиеттерді сіңіруге, сапалы білім мен саналы тәрбие беруге ұмтылуымыз қажет екенін көрсетеді.
Демек жас отандастарымызға үлгі тұтатын, өмірлік жолында биік қоятын тұлғалар қажет. Ол – көптің көкейіндегі дүниені ашық жеткізетін, бастысы жетістіктер мен табысқа табанды еңбекпен жеткен жандар болуы керек.
Ал іскерлік әрі көшбасшылық қабілеті арқылы ауқымды қауымдастықтар құрған қоғам белсенділері мен кәсіпкерлік рухымен қоғамның дамуына, жаңа жұмыс орындарының ашылуына, ел экономикасының өркендеуіне үлес қосып жүрген кәсіпкерлеріміздің еңбегін жастарға насихаттау – «ÓzgeEpic» кеңістігі мақсаттарының бірі. «Isker talks» жобасының мақсат-міндеті осы аталған құндылықтармен үндеседі.
– Алаңда осы уақытқа дейін кімдер қонақ болды?
– Кез келген отандық озық маман өзінің жүріп өткен жолы, кезеңдері, саласының артықшылықтары мен кемшіліктері, өзінің шешімдері мен көзқарастарымен бөліседі. Қонақ жиналған аудиториямен сұхбат құра отырып, олардың сұрақтарына, өз ісін бастағысы келіп жүргендерге өзіне көмектескен білімі мен тәжірибесін ескеріп, бөліседі. Спикер мен келген аудитория мүшелері өзара танысып, алда іске асуы мүмкін жобаларды жоспарлауға мүмкіндік алады.
Біздің алаңның алғашқы спикері қайырымдылық қозғалысын жаңа сапалық деңгейге көтерген отандық қор «Asarume» негізін қалаушы Асхат Нұрмашев болды. Кездесуде ол жастармен өзінің жетістік жолындағы бес құпиясымен бөлісті. Бұл – әділдік, шыншылдық, жомарттық, ерлік, ықылас. Одан кейін білім саласындағы бизнестің мүмкіндіктері мен қиыншылықтары турасында алаңда «Дарын» мемлекеттік жастар сыйлығының лауреаты, «Bugin» холдингінің директоры Айбек Қуатбай сөз сөйледі.
Қазір өзекті әрі трендтегі сала IT бағытында кәсіпкер Айболат Құлатай спикер ретінде шақырылды. Қонақ қазақша контент жасаудағы үрдістермен, қалай монетизация жасау керек екенін көрсетті. Ал тарих пен бүгінді әдемі ұштастыра білген креатив өнімдер турасында «Olja_peak» кәсібінің негізін қалаушы, бес тілде еркін сөйлейтін, отандық өнімді дамытуға үлес қосып жүрген жапонтанушы Сәулет Бақыткелді келіп, тәжірибесімен бөлісті.
Міне, осы аптада ғана Қазақстанның танымал кәсіпкері және қоғам қайраткері, «Respublica» партиясының тең төрағасы, «АгромашХолдинг KZ» АҚ президенті, Қостанай трактор зауытының директоры Динара Шүкіжанова «Саясат пен бизнестегі әйелдердің рөлі» тақырыбында дәріс оқыды. Сұхбат барысында Динара кәсіби жолының алғашқы қадамдарынан бастап, бизнесте табысты болудың қыр-сырын, стратегиялық ойлау мен шешім қабылдаудың маңыздылығын жан-жақты талдады. Ол саясат пен бизнестегі әйелдердің рөліне ерекше тоқталып, нәзік жандылардың қоғамдық және экономикалық салаларға қосатын үлесін арттырудың маңызын атап өтті. Оның айтуынша, қазіргі заманғы озық мамандар басқарушылық қабілеті мен кәсіби әлеуеті арқылы қоғамда оң өзгерістер жасауға қабілетті. Д.Шүкіжанова осы бағыттағы жаңа бастамаларды дамыту – елдің тұрақты дамуына және экономикалық өрлеуіне оң әсер ететінін баса айтты. Осындай жетекші тұлғалардың тәжірибесі мен құнды кеңес ел жастарының өмір жолында бағыт-бағдар болары анық.
– Жастар қандай қамқорлыққа зәру?
– Әлемнің әр түкпіріндегі мемлекетте, әр заманда жастар ерекше ілтипат пен қамқорлыққа ие. Көпшілік ұлт үмітін арқалаған ел ертеңі жастар деп сенеді. Сондықтан олардың қазіргі қажеттіліктерін өтеп, өткір тұрған мәселелерін шешу, дамуына жағдай жасау әр азаматтың міндеті саналады. Өйткені еліміздің тарихы мен мәдениетінің тағдыры, дамуы мен модернизациялануы бүгінгі ұрпақпен тікелей байланысты.
Ел жастарын алаңдатар түйінді мәселе көп. Басым көпшілігі баспана, жұмыссыздық жайын ойлайды. Кей бөлігі білім сапасы мен рухани құндылықтарына алаңдайды. Енді бірі жастар саясатындағы олқылықтарды тізбектеп, әлі де назар аудару керек дүниелерді атап жатады. Меніңше, әр мәселеде жас буынға бағыт-бағдар беру маңызды. «ÓzgeEpic» креатив хабы жастарды жаңашылдыққа үндейді. Заманауи бәсекеге қабілетті отандық өнерді дамытады, қоғамның мәдени санасын арттыруға сеп бола отырып, дарынды, зияткер жастарды қолдайды.
– Әңгімеңізге рахмет.
Әңгімелескен –
Зейін ЕРҒАЛИ,
«Egemen Qazaqstan»
