Форумның алғашқы күні республикалық Аналар кеңесі мүшелерінің біліктілігін арттыру мақсатында семинар ұйымдастырылған. Оған Қазақстан халқы Ассамблеясы республикалық Аналар кеңесінің төрағасы Нәзипа Шанаи, «Ана үйі» негізін қалаушы Анар Рахимбаева, Атырау облысы әкелер кеңесінің төрағасы Шота Қанатов, сондай-ақ мемлекеттік органдардың өкілдері және өңірлік Аналар кеңестерінің мүшелері қатысты.
Біліктілікті артыру семинары барысында «Біртұтас тәрбие» тұжырымдамасын іске асыруда қоғамға тұсау болар өткір мәселелер талқыланды. Ал екінші күні елордадағы Достық үйінде салтанатты іс-шара өтті.
Жиынға Қазақстан халқы Ассамблеясы төрағасының орынбасары Марат Әзілханов, Мәдениет және ақпарат вице-министрі Айзада Құрманова, Оқу-ағарту министрлігі тәрбие жұмысы және қосымша білім департаментінің директоры Меруерт Медетбекова, Ұлттық ұлан бас қолбасшысының тәрбие және әлеуметтік-құқықтық жұмыстар жөніндегі орынбасары генерал-майор Қанат Үмбетов, аталған кеңес мүшелері және этномәдени бірлестіктердің өкілдері қатысты.
– Аналардың патриотизмді, ұлттық рухты қалыптастырудағы және отбасылық құндылықтарды сақтаудағы маңызы зор. Аналар кеңесі 10 жыл ішінде көптеген бастаманы жүзеге асырып, этносаралық келісімді дамытуға және отбасылық дәстүрлерді нығайтуға елеулі үлес қосты. Республика бойынша 1 700-ден аса Аналар кеңесі гендерлік теңдікті сақтау, әйелдердің құқықтарын қорғау, отбасы институтын дамыту, әрі нашақорлық пен зорлық-зомбылық сияқты әлеуметтік мәселелермен күресу сияқты мемлекеттік басымдықтар шеңберінде өз қызметін белсенді жүргізіп жатыр, – деді А.Құрманова.
Қатысушылар «Саламатты сана» арнайы жобасының жүзеге асырылу барысы мен өңірлік Аналар кеңестерінің қызметі талқылады. Іс-шарада Қуандық Бишімбаевтың ісінде мемлекеттік айыптаушы болған Айжан Аймағанова сөз алды. Ол жиналғандарды мерейтоймен құттықтап, халықты қоғамда құқықтық мәдениетті насихаттауға белсенді атсалысуға шақырды.
– Кейінгі кезде жастар арасында құқық бұзушылықтың көбеюі байқалады. Зорлық-зомбылық, вандализм, бұзақылық фактілері мен балаларға қатысты қылмыстардың артуы алаңдатып тұр. Балалар құқық пен бостандық сақталатын қауіпсіз қоғамда өсуі қажет. Қоғам заңның үстемдігі арқылы ғана дамиды. Мемлекет басшысы Қасым-Жомарт Тоқаев та дәл осы сөздерді халық алдындағы баяндамаларында айтып жүр. Аналар кеңесі «Тәртіпті өзіңнен баста» қоғамдық акциясын бастауды ұсынды. Мұндағы басты мақсат – жастар арасында құқықтық мәдениетті қалыптастыруға үндеу, құқық бұзушылық пен тәртіпсіздіктің алдын алу, қоғамда заң мен тәртіп үстемдігін насихаттау. Осы арқылы жастарды құқық бұзушылықтан аулақ болуға тәрбиелейміз, – деді прокурор.
Басқосуда Аналар кеңесінің белсенді мүшелері азаматтық қоғамды дамытуға және этносаралық бірлікті нығайтуға қосқан үлесі үшін марапатталды.
