Ақтау гарнизоны баспасөз қызметінің хабарлауынша, «Батыс» өңірлік қолбасшылығы теңіз жаяу әскерлері бригадасының және материалдық-техникалық қамтамасыз ету базасының 576 жас сарбазы нақты ұрыс қимылдарына барынша жақын жағдайда оқудан өтіп жатыр.
– Танк жүргізіп, сынақтан өту жауынгерлерді жақын қашықтықтағы ұрыс жағдайында жаудың сауытты техникасымен күресу әдістерін үйретуге мүмкіндік береді. Жаттығудың психологиялық тұрғыдан қиындығына қарамастан, жауынгерлердің бәрі кедергілерді еңсере білді, – деп атап өтті батальон командирінің орынбасары капитан Ратбек Қуатбеков.
Қиын тапсырманы бастамас бұрын сарбаздар шартты қарсыластың танктерімен күресудің негіздерін игерді. Сондай-ақ оларға әртүрлі ұрыс жағдайында танкке қарсы гранаталарды және қару-жарақты сауытты машиналарға қарсы қолдану ережелері мен тәсілдері түсіндірілді.
– Таңертеңнен бастап кедергілер жолағына шықтық. Алдымен Калашников автоматын бөлшектеп, жинадық. Содан кейін ластанған аймақ пен тікенді сымды еңсеріп, 20 килолық жүкпен жүріп өттік. Сабақ танктерді жүргізумен аяқталды. Алған әсерімді сөзбен айтып жеткізу қиын. Мұны өзіңіз сезінуіңіз керек, – дейді Ақмола облысынан шақырылған Давид Массеров.
Жас жауынгерлер курсты 23 қарашада аяқтап, сосын әскери ант беріп, теңіз жаяу әскерлерінің шабуыл батальондарына жіберіледі.
Маңғыстау облысы
