Суретті түсірген – автор
Өскемен – Тарғын – Самар бағытында бір емес, екі тәулік жол болмады. Қалың түскен ылғалды қарды аршып алу ауыр техникаға да оңай соқпады. Былтыр алты метрге жуық қар түскен Марқакөл өңірінде де жауған қардың салдарынан аудан орталығынан Төсқайыңға дейінгі жол жабылды. Оның арғы жағындағы Балықтыбұлақ, Шанағаты ауылдары жылдағыдай байланыссыз қалған. Таулы аймақта ғана емес, Секисовка мен Риддер арасындағы тура жолда да қозғалыс тоқтатылған. Жалпы, өңірдің қай бағытында болмасын, тіркемесі бар жүк көліктерінің қозғалысына шектеу қойылған. Әсіресе, Өскемен – Алтай бағытындағы күре жолда тіркемесі бар, жартылай тіркемелі көліктер қыстай қатынай алмайды.
Бұл жолғы қарлы боран облыстық төтенше жағдайлар қызметкерлері тұрғындарға тәулік бойы ескерту жіберіп отырды. Жол патруль полиция қызметкерлері қаланың төрт бұрышында тәртіптің сақталуын қатаң қадағалады. Шектеуге құлақ аспай, жолға шыққан азаматтар жауапкершілікке тартылатынын еске салды.
– Ақтүтек боранды күндері күре жолдарда полицейлер қауіпсіздікті қамтамасыз етуде барын салып, жұмыс істеді. Әсіресе, жолдардың қауіпті учаскелерінде патрульдеуді ұйымдастырды. Қиын жағдайға тап болған жолаушыларға көмек қолдарын созды. Жол ашылған сәтте ұзын-сонар колонналарға полиция патрулі жол бастады, – дейді ШҚО ПД баспасөз хатшысы, полиция майоры Гүлнұр Түсіпова.
Полицияның жеделдігі мен кәсіби әрекет етуінің арқасында көптеген жолаушылар оқыс жағдайлардан аман қалғаны анық. Әйтпесе, жол жиегіне көлігін қалдырып, адасып кеткен азаматтар да болды. 1954 жылы туған Өскемен қаласының тұрғыны қаладан ұзай бере жол бойындағы төбені айнала өскен бұта, қараған жақты бетке алған. Мақсаты итмұрын теріп алмақ болыпты. Боранды күні жолдан шығып кеткен ол адасып, қайтар ізін таппаған. Қауіптің төніп тұрғанын сезді ме, дереу 112 нөміріне хабарласып, көмек шақырыпты. Жедел қимылдаған құтқарушылар адасқан азаматты тауып, көлігіне дейін аман-есен жеткізген.
Осы ретте төтенше жағдайлар департаменті мамандары жолға шықпас бұрын күн райын болжап, жол жағдайына көз жеткізіп алуды ескертеді. Қалта телефонға келген хабарламаларға бей-жай қарауға болмайды. Алыс жолға шыққан жағдайда арқан, жанармай қоры, күрек, қол шам, алғашқы медициналық көмек көрсету қобдишасы, жылы киім, азық-түлік алуды ұмытпаған жөн. Сондай-ақ жылдамдық режімін аса қатаң сақтау қажет. Төтенше жағдайға тап болса, 112 нөміріне қоңырау шалуға кеңес береді.
Шығыс Қазақстан облысы
