Сурет: adyrna.kz
Бас прокурордың баспасөз қызметі таратқан мәлімдемесінде Аустралияның құлдыққа қарсы комиссары осы жылдың 2 желтоқсанында қызметіне кіріседі. Оның өкілеттік мерзімі – 5 жыл.
«Комиссар қызметі қазіргі құлдық қанаудың барлық түрін қамтиды. Оның ішінде адам саудасы, мәжбүрлі неке, еріксіз еңбекке мәжбүрлеу, заңсыз адам жалдау бар. Құлдыққа қарсы комиссар Аустралия үкіметінің мұндай құқық бұзушылықтардың алдын алу, құлдық құрбандарына қолдау көрсету жөніндегі жұмысын басқарады әрі үйлестіреді», деп мәлімдеді М.Дрейфус.
Ел билігі жаңа комиссар мен оның кеңсесін қамтамасыз етуге 8 млн Аустралия долларын (5,3 млн доллар) бөлгенін айтты.
«Walk Free» ұйымының жаһандық құлдық индексіне сүйенсек, қазір Аустралияда 41 мың адам құлдық құрсауында жүр. Мәселен, қыркүйек айында Жаңа Оңтүстік Уэльстің құлдыққа қарсы комиссары, доктор Джеймс Кокейн жариялаған есебінде Аустралияның ең көп қоныстанған штатында 16 400 адам құлдықта өмір сүріп жатқанын айтады. Бұған Жаңа Оңтүстік Уэльстің парламенті жауап беріп, осы мәселеге қатысты тексеріс бастаған.
«Уақытша еңбек мигранттарына, әсіресе, Жаңа Оңтүстік Уэльстің ауылдық жерлеріндегі ауыл шаруашылығы, бау-бақша және ет өңдеу салаларындағы жалақысы төмен жұмысшыларға жалақысы уақытында төленбейді. Олар қарыз құлдығы, алдап адам жалдау, мәжбүрлі еңбекке тартылып, сексуалдық құлдық, адам саудасы қаупіне ұшыраған», деп көрсетті Д.Кокейн.
Осының салдарынан мыңдаған жұмысшы жұмыс орындарын тастап, қаша бастаған. Алайда олардың визасы мен Аустралияда болу құқығы нақты жұмыс берушіге байланысты болғандықтан, олардың құқықтарын қорғау қиынға соғып тұр. Құжатсыз жүрген мигранттардың саны артқан, олар тұрғылықты жер таба алмай, медициналық сақтандырудан қағылып, заңды жұмысқа да орналаса алмай жүр.
«The Guardian» мәліметіне сәскес, жүздеген жұмысшы қазір Жаңа Оңтүстік Уэльстің Riverina қаласындағы лагерьлерге қоныстанған, оларға қолдау көрсететін қауымдастық топтары көмектесуге тырысып жатыр. Алайда тұруға қажетті шатырлар жетіспей, азық-түлікпен қамтамасыз ету де қиындық туғызған.
Жалпы, еңбек мигранттарының құқығын қорғауда мемлекетаралық келісімдер маңызды рөл атқарады. Ал егер адам заңсыз жолмен өзге елге барып ақша тауып, құлдыққа тап болса, одан шығу оңайға соқпайды. Мысалы, Тайланд, Мьянма, Лаос елдерінің арасындағы «алтын үшбұрыш» деп аталатын қауіпті аймақтарда 100-ге жуық отандасымыз жоғалып кеткені БАҚ-да жарияланған еді. Статистикалық мәліметтерге сүйенсек, кейінгі екі жылда қылмыстық топтардан 28 ел азаматы құтқарылған. Сондықтан шетелге жұмысқа барам деушілерге Қазақстан бірнеше елмен үкіметаралық келісімдерге қол қойғанын еске саламыз. Осы жылдың мамырында Еңбек және халықты әлеуметтік қорғау министрлігі көші-қон саясатының 2023–2027 жылдарға арналған тұжырымдамасын іске асыру аясында бірқатар елмен екіжақты келіссөздер жүргізіп, Түркия, БАӘ, Сауд Арабиясы, Ұлыбритания, Корея, Израиль, Германия, Латвия және Жаңа Зеландиямен үкіметаралық келісімдерге қол қойды. Мұнда еңбек мигранттарының келуі, елде болуы мен кету тәртібі, еңбек жағдайлары, жалақы, өтемақылар төлеу тәртібі реттеліп, көрсетілген.
