Суреттерді түсірген – Юрий БЕККЕР Суреттерде: фотографтар Владислав Якушкин мен Ерболат Шадрахов
Сонымен Алматыда «Қазақстанның тұмса табиғаты» веб-сайтының тұсаукесер рәсімі өтіп, сайт таныстырылымы аясында аттас фотокөрме қатар ашылып, жұртшылық назарына жоба дерекқорына кірген жан-жануарлардың тамаша суреттері ұсынылды. Осы арада жаңа жобаның бірнеше жақсы қыры бар екеніне тоқтала кету керек, егер тек фотоөнердің отызға жуық жанры болса, бұл осы бағыттың дамуына серпін берері сөзсіз. Бір жағынан жаңа сайт ғылымға деген қызығушылықты арттыруға септесіп, биоалуандықты сақтаудың маңыздылығына қоғам назарын аударатыны даусыз.
Бір емес, үш бірдей жоғары оқу орнының фотоөнерді меңгеріп жүрген студенттерінің қызығушылығын оятқан ілкімді жобаны «Шеврон» компаниясының демеушілігімен «EcoForming» экология және білім беру қорымен бірге Қазақстан Зоология институты мен «National Geographic Qazaqstan» журналының қолдауымен жүзеге асырылып жатыр.
Жоба авторларының айтуынша, жаңа сайт интернет-пайдаланушыларға еліміздің жан-жануарлар әлемін кеңінен насихаттауды, аң мен құстардың бірегейлігін көрсетуді мақсат еткен. Соған орай, әрбір тіршілік иесінің түр-сипаты мен ерекшеліктерін танытатын жоғары сапалы портреттік фототүсірілімдер жасалған. Фотогалерея жобаны дамыту барысында тың деректермен, жаңа фотосуреттермен толыға бермек.
Бір жағынан «Қазақстанның тұмса табиғаты» веб-сайты студенттер мен оқушылар үшін ғана емес, байтақ еліміздің фаунасын зерттеушілерге де көрнекті әрі бағалы дерекқор ретінде қызмет атқарады. Бояуы қанық платформаның бірегейлігі сонда – мұнда тұмса табиғаттағы жан-жануарлар дүниесін танып-білгісі келетін зерттеушілер мен әуесқойларға аңдар мен құстардың портреттік һәм табиғи ортадағы жоғары сапалы фотосуреттері ұсынылмақ.
Тамаша жобаның тұсаукесер рәсімінде «Шеврон» компаниясының әлеуметтік инвестициялар бойынша кеңесшісі Лейла Айтмұханова мен жобалық команда өкілі Қанат Абашов жұмыстардың қалай жүріп жатқаны туралы қызықты баяндады.
Осы жобадағы ең қиын да қызықты жұмысты атқарған фотографтар – «National Geographic Qazaqstan» журналының шеф-фотографы Ерболат Шадрахов пен тұмса табиғат фотографы Владислав Якушкинге сөз берілгенде, көзмергендер еліміздің зообақтары мен ұлттық қорықтардағы қызықты сәттерді ерекше әсермен әңгімеледі.
АЛМАТЫ
