Ағайынды Әсембек пен Әлембек сарбаз атанып, сапқа тұрғанын мақтан етеді. Әсембек өмірге өз сыңарынан 10 минут ерте келген. Жарық дүниеге өзінен бірер минут қана кейін келген бауырына әрдайым қамқорлық көрсетіп, үлгі болып келеді. Болашақ сарбаздар Қарағандыдағы №45 гимназияда білім алып, кейін Астана қаласындағы Индустриалды техникалық колледжіне оқуға түседі. Әсембек көлік слесары, ал Әлембек токарь мамандығын таңдайды. Егіздер оқумен бірге спортты да қатар алып жүреді. Мәселен, Әсембек кикбокспен, ал Әлембек ММА-мен айналысқан. Жасы он сегізге келген күні екеуі де әскери қызметке өз еркімен келіп, Отанға адал қызмет етуді мақсат тұтқан еді. Бүгінде егіз ұлдар Ұлттық ұлан қатарында елдің тыныштығын қорғап, қауіпсіздігін қорғауда қырағылық танытып келеді.
Әскери бөлімшеде Әсембек пен Әлембектен басқа, Қостанай облысынан келген Нұрсұлтан мен Ерсұлтан атты ағайындылар да бар екен. Олар да әскер қатарында қызмет етуді зор мақтаныш деп біледі. Екеуі де Ы.Алтынсарин атындағы мектептен түлеп шығып, Индустриалдық педагогикалық колледжінде білім алады. Оқуды сәтті аяқтаған соң тыныштық сақшысы атанып, ел қауіпсіздігін қорғауға өздері сұранып келген.
– Қаралы қаңтардан кейін әскерге баруды жөн санадық. Басында ата-анамыздың қарсы болғаны рас. Бірақ әкеміз бен ағамыз таңдауымызды қолдап, батасын берді. Біздің мақсат – Отанымызды қорғау және азаматтық борышымызды атқарып, үлкен абыроймен үйге оралу. Ата-анамыздың, елдің мақтанышы болуды армандаймыз, дейді ағайынды сарбаздар.
Мерзімді қызметін өтеуге бар ынта-жігерімен келген ағайындылар туған жердің тыныштығын сақтау жолында бір-біріне қолдау көрсетіп, кедергілерді бірге еңсеруге серт берген. Өздері айтпақшы, ұлтжандылықтың үлгісі болып, ел болашағына қалтқысыз қызмет ету, болашақ ұрпақтың алаңсыз ұйқысы үшін үлес қосудан асқан бақыт жоқ.
