Шындығын айтқанда, мектептегі тамақтандыруды ұйымдастырылуына атқарушы органдар тарапынан әлі де болса бақылау жеткіліксіз болып отыр. Сондай-ақ министр мұны заңнама талаптарының бұзылу фактілерінен де анық аңғаруға болатынын айтты. Мониторинг тобы заң талабының бұзылуы бойынша 771 фактіні анықтаған. Осының бәрі – республикалық мониторинг қорытындысында белгілі болды.
Бұдан бөлек, министрлік мектепте тамақтандыруды ұйымдастыру бойынша кешенді бағалау жүргізген. Оған асханалардың материалдық-техникалық жабдықталуы, бір оқушыға шаққандағы өңірдегі тамақтану құны, ата-аналар арасында жүргізілген сауалнама ескерілді. Соның нәтижесінде, Жамбыл, Маңғыстау, Алматы, Атырау облысы мен Шымкент қаласы әкімдіктері тарапынан мектептерде сапалы тамақтануды ұйымдастыруға тиісті деңгейде көңіл бөлінбегені расталды.
«Қазіргі таңда министрлік мектепте тамақтандыру қызметін сатып алу кезінде өнім берушілерді іріктеу талаптарын бұзғаны үшін лауазымды тұлғаларға әкімшілік жауапкершілік енгізу мәселесін пысықтап жатыр», дейді Ғ.Бейсембаев.
Еске салайық, бұған дейін министрлік талаптарды күшейтіп, білім беру ұйымдарында тамақтандыруды ұйымдастыруға қатысты 7 нормативтік-құқықтық актіні қайта қараған болатын.
