Сурет: informburo.kz
Жобада жасалған жұмыстың нәтижесі елордада өткен форум аясында айтылды. Іс-шараны Мәдениет және ақпарат министрлігі және Қаржылық мониторинг агенттігінің қолдауымен «Медицина жастары» РҚБ ұйымдастырды. Форумға құқық қорғау органдары, банк секторы, қоғамдық ұйымдар өкілдері мен «Аlayaq.net» қозғалысы еріктілерін қоса бас аяғы 20 мың адам қатысты. Елдегі жоғары оқу орындарының студенттері, Армения, Әзербайжан, Беларусь, Қырғызстан, Өзбекстаннан салықтық (қаржылық) тергеу органдарының өкілдері онлайн режімде қосылды.
– Мемлекет басшысы Қасым-Жомарт Тоқаев өзінің биылғы Жолдауында Үкіметке интернет алаяқтыққа қарсы іс-қимыл шараларын күшейтуді тапсырды. «Alayaq.net» жобасы осы міндеттің орындалуын қамтамасыз етудің жарқын үлгісі болды. Бұл бастама интернет-алаяқтықпен, қаржы пирамидаларымен, дропперлермен күресудің өзекті мәселелерін талқылауға, анықтауға, сондай-ақ жастар арасында қаржылық сауатты арттыруға бағытталды, – деді Мәдениет және ақпарат вице-министрі Евгений Кочетов.
Жиында қатысушылар жоба нәтижелерін талқылап, тәжірибе алмасты. Кибералаяқтықтан қорғанудың жаңа әдіс-тәсілдерін де меңгерді.
«Аlayaq.net» жобасының негізін қалаушы Абылайхан Әбдіраштың айтуынша, қозғалыс белсенділері өңірлерде 125 мыңнан аса адамды қамтитын қаржылық сауат жөніндегі марафондарды өткізген. Қаржылық мониторинг агенттігі, полиция және басқа да ведомстволардың қолдауымен жоба 28 мемлекеттік және қоғамдық ұйымдармен ынтымақтастық орнатқан.
– Мәдениет және ақпарат министрлігі, Азаматтық бастамаларды қолдау орталығы, сондай-ақ жастардың ниет білдіруімен арнайы грант бөлінді. Жоба 2022 жылы басталды. Осы уақытқа дейін 17 облыс пен 3 қаланың барлығын толық қамтыдық, – деді А.Әбдіраш.
Ал жоба жетекшісі Нұрсұлтан Орынбеков 10 мыңнан аса адамға тегін қаржылық онлайн курс өткізілгенін айтты. Курс барысында базалық экономикалық қаржылық білімі қалыптастыруға көп көңіл бөлінген. Қазіргі таңда әлеуметтік желілердегі ақпараттық жұмыстар 150 млн-нан аса қаралым жинады. Екі жыл ішінде неше түрлі алаяқтық схема әшкереленді. Оның логикалық тізбегі қандай болады, әлеуметтік-психологиялық тұрғыдан қандай адамдар жиі алданады деген секілді түрлі кейс зерттелді. Жоба аясында «Alayaq.net» сайты да іске қосылды. Оның көмегімен пайдаланушылар алаяқтық оқиғалары туралы хабарлап, қаржылық сауатын арттыра алады. Форум соңында «Alayaq.net» жобасының үздік еріктілері марапатталды.
