Инфрақұрылымдық жобалар жүзеге асуда

Кеше Премьер-Министрдің бірінші орынбасары Бақытжан Сағынтаев 2015-2019 жылдарға арналған «Нұрлы Жол» инфрақұрылымдық даму мемлекеттік бағдарламасын жүзеге асыру барысына арналған кеңес өткізді, деп хабарлады Премьер-Министрдің баспасөз қызметі. Бағдарлама шеңберінде елдің ішкі рыногын, транзиттік және экспорттық әлеуетті ұлғайтуға, сон­дай-ақ, инфрақұрылымды да­мы­­туға бағытталған басым­дықты жобалар жүзеге асырылатын болады. Қазіргі уақытта «Батыс Еуропа – Батыс Қытай» автодәлізінің, Астана – Алматы, Астана – Өс­ке­мен, Қызылорда – Жезқазған – Қа­рағанды, Астана – Ақтөбе – Атырау – Ақтау, Алматы – Өскемен трассаларының учаскелерінде құрылыс жұмыстары жүруде. Теміржол саласы мен көлік логистикасы жобалары бойынша да жұмыстар жүзеге асырылуда. Атап айтқанда, Алматы-1 – Шу те­міржол учаскесінде екінші жол құ­рылысы үшін қазірдің өзінде топо-геодезиялық және инже­нерлік-геологиялық зерттеулер жүр­гізілуде. Боржақты – Ерсай желі­сінің құрылысы жүруде, Құ­рық портында паромды өткел салу жобасы бойынша мемлекеттік са­раптама қорытындысы алын­ды, геодезиялық және инже­нерлік-геологиялық зерттеулер жүргізілуде. Астана қаласы әуежайының ұшу-қону жолағы мен терминалын қайта жаңғырту бойынша жұмыстар атқарылуда. Қазақстанда АЭА мен ин­дустриялық парктерді дамытуға, тұрғын үй, мектептер мен бала­­бақ­шалар салуға, елімізге келетін және сыртқа шығатын туризм­ді одан әрі дамыту үшін инфра­құ­ры­лымдар жасауға, АӨК субъек­тілерін, отандық автомобильдер, тікұшақтар, жолаушылар вагондарын жасаушыларды қолдауға бағытталған қаржылар игерілуде. Кеңес қорытындысы бойынша Бақытжан Сағынтаев ми­нистрліктерге, облыстар, Астана және Алматы қалалары әкімдеріне қарқынды бәсеңсітпей, 2015-2019 жылдарға арналған «Нұрлы Жол» инфрақұрылымдық даму мемлекеттік бағдарламасын жүзеге асыру жөніндегі іс-шаралар жоспарының уақтылы жүзеге асуын қамтамасыз етуді, сондай-ақ, ведомствоаралық іс-қимылды және қаржының тиімді игерілуіне бақылау жасауды күшейтуді тапсырды.