Сурет: ara24.kz
25 қараша мен 10 желтоқсан аралығында өтетін бұл акция бүкіл ел аумағын қамтиды. Әйелдер мен балалардың құқықтарын қорғауға бағытталған іс-шара Ақжайық өңірінде де бастау алды. Баспасөз конференциясына келген облыс әкімінің гендерлік саясат мәселелері жөніндегі штаттан тыс кеңесшісі Жансұлу Төремұратова, БҚО полиция департаменті жергілікті полиция қызметі басқармасы бастығының орынбасары Арман Дүйсекенов, «Ақ отау» отбасы орталығы» қоғамдық бірлестігінің төрайымы Алтынай Есқалиева қоғамның назарын гендерлік зорлық-зомбылық мәселесіне аударды.
Іс-шара тұрмыстық зорлық-зомбылықтың алдын алу, әйел мен бала құқығын қорғауға бағытталған. Акция «Бейжің декларациясы мен іс-қимыл платформасының 30 жылдығына орай: әйелдерге қатысты зорлық-зомбылықты тоқтату үшін бірігейік» ұранымен өтеді.
– Акция аясында мемлекеттік органдар, халықаралық және үкіметтік емес ұйымдар елдің барлық өңірінде көшпелі кездесулер өткізіп, тұрғындарға тұрмыстық зорлық-зомбылықтан қорғану алгоритмін түсіндіреді. Еліміздегі дағдарыс орталықтары арқылы әйелдерге құқықтық, психологиялық және әлеуметтік көмек беріледі. Сондай-ақ LED-экрандарда және кинотеатрларда арнайы бейнероликтер ойнап, «111» бірыңғай мемлекеттік сенім телефоны арқылы зорлық-зомбылық құрбандарына шұғыл көмек көрсетіледі, – дейді Жансұлу Меңешқызы.
Тұрмыстық зорлық-зомбылық құрбандарын қолдау мақсатында Орал қаласындағы мемлекеттік дағдарыс орталығында – 10 орын, ал Ақсай қаласындағы үкіметтік емес ұйым басқаратын орталықта 9 орын жабдықталып, қызмет көрсетіп жатыр. Биыл өңірде 379 әйел осы орталықтардың көмегіне жүгінген екен. Арман Құсайынұлының айтуынша, жыл басынан бері 35 әйел полиция жолдамасымен уақытша баспанамен қамтамасыз етілген.
Әйел мен баланы қорғау – тек мемлекеттік органдардың міндеті емес. Қоғамның әр азаматы осы бағыттағы бастамаларға белсене қатысуға тиіс.
Батыс Қазақстан облысы
