Сурет: abai.kz
Қазақстан – Ресей сарапшылары кеңесін өткіздік. Бұл – дипломатияның екінші бір тармағы деп есептеледі. Осы орайда жиында Қазақстанның стратегиялық зерттеулер институты Ресей Ғылым академиясының әлемдік экономика және халықаралық қатынастар институтының өкілдерімен әріптестікті бекемдеп, оны жаңа дәрежеге көтеру жағын талқыладық.
Күн тәртібіне сәйкес, сауда-саттық, экономикалық байланыс, логистика мен энергетика, қоршаған ортаны қорғау мен климаттың өзгеруіне қарсы тұру сынды мәселелер қаралды.
Екі ел сарапшыларының ортақ диалог алаңын құрғанына 20 жылдан асты. Байқап отырсақ, қазіргі таңда мемлекеттер арасында 143 бірлескен бастама бар. Міне, осы жобалардың жүйелі жүзеге асырылуы үшін қарым-қатынасқа қатысты кез келген шешім сарапшылардың елегінен, талқылауынан өтсе, сапалы болатыны сөзсіз.
Қазақстан мен Ресейдің қарым-қатынасы ел шекарасында орналасқан ауыл-аймақтар мен қала тұрғындарының өмір сүруіне әсер ететіні тағы бар. Бұл ретте екі мемлекеттің байланысы, әсіресе шекаралық аймақта тұратын халықтың жағдайына оң әсер ететіндей аргументтерді қарастырып, талдауымыз қажет. Ең бірінші жайт – экономикадағы шикізаттық емес секторды дамыту.
Президент Қасым-Жомарт Тоқаев Жолдауларында атап өткендей, қазір біз экономикадағы шикізаттық емес секторды дамытуға күш салуымыз қажет. Сондықтан шет мемлекеттерден инвестиция тарту – басты мақсат. Бұл ретте мемлекеттер арасындағы мүмкіндіктерді, кедергілерді саралауда сарапшылардың орны ерек.
Алуа ЖОЛДЫБАЛИНА,
Президент жанындағы ҚСЗИ директорының орынбасары
