Көпшілік назары Махмұд Сабырхан мен тайпейлік Ян Лин Лай арасындағы жекпе-жекке ауды. Қандасымыз – екі әлем чемпионатында жеңіс тұғырына көтеріліп, жанкүйерлер жүрегін әлдеқашан жаулап үлгерген жампоз. Ол 2021 жылы Белградта күміс алса, 2023 жылы Ташкентте бас жүлдені қанжығасына байлады. Сол аралықта құрлық чемпионатының күміс медалін мойнында жарқыратты. Сонымен қатар биыл Махмұд Париж Олимпиадасында бақ сынады. Ян Лин Лайда ондай атақтың бірі де жоқ. Сол себепті де Сабырханға қарсыласына сан соқтыру айтарлықтай қиындық туғызбады. Бірінші раунда-ақ Тайпей боксшысын үш рет нокдаунға жіберіп, төрешінің бәсекені мерзімінен бұрын тоқтатудан басқа амалы қалмады.
Аида Әбікеева өзбекстандық Дильфуза Бековамен біраз табан тіресті. Десек те үш раундтың қорытындысы бойынша қазылар Аиданың мықтылығын мойындады. Ал Милана Сафроновамен күш сынасуға тиіс тайпейлік Мин Лимен рингке көтерілуден бас тартты. Сөйтіп жоғарыда есімдері аталған үш жерлесіміз жартылай финалға жолдама алды.
Кеше Дулат Бекбауов (67 кг) малайзиялық Айман Мұхаммад Арифпен, Абылайхан Жүсіпов (71 кг) түрікменстандық Байрамдурды Нұрмұхаммедовпен, Диас Молжігітов (75 кг) жапониялық Даиго Сунагомен, Әйгерім Сәттібаева (48 кг) филиппиндік Офелия Магномен, Сымбат Әлиасқар (54 кг) қытайлық Вэньцянь Сюмен сайысқа түсті.
