Солтүстік Қазақстанда мүгедек жандар тегін демалады

ПЕТРОПАВЛ. 17 маусым. Қызылжар өңірінде биыл 866 мүмкіндігі шектеулі жанды аймақтық оңалту шипажайларында тегін демалдыру жолдары қарастырылған.  Бұл туралы облыстық жұмыспен қамту және әлеуметтік бағдарламалар басқармасының мамандары хабарлады. Мүгедектердi оңалту бөлiмiнiң жетекшісі Надежда Завьялованың айтуынша, өңірде мүгедектердi оңалтумен айналысатын Солтүстік Қазақстандағы «Солнечный» және Ақмола облысындағы «Зеленый бор» санаторийлеріне емделушілердің   алғашқы тобы аттанып кеткен. «Тегiн жолдама мемлекет бюджетiнен бөлiнген қаражат есебiнен мүгедектер мен науқас балаларға берiледi. Оларға 866 жолдама үлестірiлдi. Келесi жылы демаламын деушiлерден де құжаттар қабылданып жатыр», дейді ол. «Солнечный» профилакторийінде ем алуға 50 солтүстiкқазақстандық тегін жолдамаға ие болды. Жылына 3 рет мүгедек жандарды қабылдайтын емдеу мекемесінде қазiр 15 адам ем-дом алуда. Солардың бірі Николай Панкратов мемлекет тарапынан жасалып жатқан қамқорлыққа дән риза. Мұнда емделушілер үшін барлық жағдай жасалған. Фитопарамонша, фитобар, механикалық массаж, аэрофитотерапевт бөлмелері жұмыс істейді. Өмір Есқали. Дерек: Солтүстік Қазақстан облыстық жұмыспен қамту және әлеуметтік бағдарламалар басқармасы. Сурет: egemen.kz