фото: ШҚО әкімдігі
Алмат Ақышов Шығыс Қазақстан облысының тумасы. Еңбек жолын Өскемен қаласынан бастаған. Жаңа әкімнің 14 жылдық еңбек өтілі бар, оның 12 жылын мемлекеттік қызметке арнаған.
Ақышов осы жылдары туризм, дене шынықтыру және спорт басқармасында, Ауыл шаруашылығы министрлігінде қызмет атқарды, Ұлан аудандық аппаратының басшысы, Аягөз ауданы әкімінің орынбасары қызметтерін атқарды, сонымен қатар энергетика және тұрғын үй-коммуналдық шаруашылық басқармасын басқарды. Соңғы екі жылда Күршім ауданының әкімі қызметін атқарды. Аймақтарды дамыту магистрі, Президенттік жастар кадрлық резервінің мүшесі.
Аймақ басшысы жаңа әкімге қаланы дамытудың жол картасын әзірлеп, таныстыруды тапсырды, оның ішінде: экологиялық мәселелерді шешу, көшелерді жарықтандыруды жаңғырту, экономикадағы, құрылыс пен абаттандырудағы негізгі жобаларды аяқтау, қаланың туристік тартымдылығын арттыру үшін кәсіпкерлік нысандарының бірыңғай жобалық кодексін енгізу.
Естеріңізге сала кетейік, Өскеменнің бұрынғы әкімі Жақсылық Омар 27 қарашада өкілеттігінің аяқталуына байланысты қызметінен кеткен еді.
