Байқаудың ашылу рәсімінде сөз сөйлеген «Ақ жол» партиясының төрағасы Азат Перуашев: «Ұлттық идеология – кез келген мемлекеттің тірегі, ол халық пен мемлекет арасындағы алтын көпір іспетті. Қазақ елі үшін Алаштан асқан, Алаштан өзге ұлттық идея жоқ. Ал идея – тірі дүние, ол үнемі дамып, тереңдеп, кеңейіп отыруы керек. Біздің байқау – дәл осы Алаш идеясын жаңғыртуға арналған бастама. Байқауға қатысушылардың әрқайсысы осы идеяның дамуына өз үлестерін қосып жатыр», деді.
Биыл 13-рет ұйымдастырылып отырған байқауға 250-ден астам студент пен маман жұмыстарын жіберіпті. Қорытынды кезеңінде қызу пікірталас өрбіп, сапалы баяндамалар жасалды. Жалпыұлттық байқауға Парламент Мәжілісіндегі «Ақ жол» фракциясының аппарат жетекшісі Берік Дүйсембинов, Парламент Мәжілісінің депутаты Серік Ерубаев, ІІМ Б.Бейсенов атындағы Қарағанды академиясының бастығы, полиция полковнигі Нұрлан Биекенов және партияның мәслихат депутаттары қатысты. ҚР ҰҒА академигі, алаштанушы Дихан Қамзабекұлы, Л.Н.Гумилев атындағы ЕҰУ «Алаш» институтының директоры, PhD Сұлтан Хан Аққұлұлы, PhD, MNU ассистент-профессоры Алма Сайлауқызы қазылық етсе, ЕҰУ қазақ кафедрасының профессоры, алаштанушы Қайырбек Кемеңгер қорытынды іс-шараны модератор ретінде жүргізіп отырды.
Іріктеу кезеңінен өткен қатысушылардың баяндамалары мен пікірсайыстарының нәтижесінде, «Алаш қайраткерлерінің Алаш республикасының мемлекеттік құрылымы туралы идеясы және оның қазіргі Қазақстан үшін өзектілігі» аталымы, «Алаш қайраткерлерінің оқу-ағарту мен ғылымдағы ұстанымы және оның қазіргі Қазақстан үшін маңызы», «Алаш қайраткерлерінің экономикалық көзқарасы және кәсіпкерлікті дамыту», «Алаш республикасы – алдыңғы қазақ мемлекеттері (Көне Түркі қағанаттары, Ұлық ұлыс – Алтын орда, Қазақ хандығы) мен қазіргі тәуелсіз Қазақ елінің заңнамалық сабақтастығын жалғайтын көпір» аталымдары бойынша еліміздің түкпір-түкпірінен қатысқан шығармашылық тұлғаларға жүлделі орындар табысталды.
