Мақсат – жұмыс орнын сақтау

Премьер-Министрдің орынбасары Бердібек Сапарбаев жұ­мыс сапарымен Алматы облы­сына келді. Негізгі мақсат өндіріс орындарындағы тұрақтылықты сақтау және еңбек адамдарының ахуалымен танысып, жұмыс­шылар құқығын қорғау болды. Билік пен жұмыс беруші ірі компаниялар және өндіріс орындары болып табылатын кәсіпорындар арасында жасалып, бұл күні қол қою рәсімі өтетін меморандум талап-тілектерін де вице-премьер таразылап бағыт-бағдар берді. Әуелгі кезекте, құрылыс жұ­мыстары дамылсыз жүріп жат­қан Талдықорғандағы көпсалалы 300 кереуетті ауруханаға барып ме­дицина саласына қатысты жайттармен танысты. Алқалы жиында Алматы облысының әкімі Амандық Ба­та­лов өңірде атқарылып жатқан жұмыстар туралы мағлұмат бер­ген соң, Елбасы «Нұрлы Жол – болашаққа бастар жол» ат­ты Жолдауын биыл ертерек жа­рия­лауының бір себебі, әлемдік дағдарыстың алдын алу қадамы болып отыр. Аталған Жолдауда осы дағдарыстан шығу жолдары да нақтыланған. Бір ғана мысалға Жетісу жері арқылы өтетін Батыс Қытай – Батыс Еу­ропа дәлізін ай­туға тұрады. Бұл игіліктің бірін­ші қадамы – жол салу. Бір ғана Алматы облысын­да жол салу, жөн­деу секілді жұмыстарға биыл бюджеттен 54 млрд. теңге бөлінеді екен. Бұл аз қаражат емес. Сөзімді Елбасының «Дағдарыс келеді. Кетеді. Ұзақ болмайды» де­ген сөзімен нақтылап Мемле­кет бас­шысының тапсырмасы­мен об­лысаралық байланыс­ты ны­ғайтып, бірі шығарған өнім­ді екін­шісі пайдаланып, ішкі өнім ал­масу байланысын нығайтудамыз. Үкіметтің атынан Алматы облысының басшылығын бүгінгі меморандумға қол қою рәсімін өз деңгейінде ұйымдастырғаны үшін рахмет айта отырып, осы меморандум талаптарының толық орындалатынына сенім артамын. Бұл құжат елді мекен­дерді жұмыспен қамтуға өзіндік ық­палын тигізетіні анық. Тағы бір үлгі тұтарлық жұмыс – «Достық үйі», «Тіл сарайы», «Спорт ке­ше­ні» Талдықорғанда салынып, пайдалануға берілгенін, ең не­гізгісі тұрғын үй кешендерінің бірінен екіншісінің асып тұрға­нын көрдік. Мұның барлығы Елбасының ұстанған саясатының дұрыстығы, ел тыныштығының сақталуы екенін білуіміз керек. Отандық өнім өндірушілерді қолдау үшін шұжықты қыр­ғыз­дан, көкөністі қытайдан тасымай, Елба­сы өткен жылдың тамызында берген тапсырмасы қант қызылшасы, жүгері секілді төл дақылдарды молынан өсіріп, өңдеп рынокқа шығару керек. Сонда бірлесе істеген жұмысымыз нәтижесін береді», деді Бердібек  Сапарбаев. Бұл күні жалпы сомасы 22,6 млрд. теңгені құрайтын бірлескен 17 меморандумға қол қойылды. Нұрбол ӘЛДІБАЕВ, «Егемен Қазақстан». ТАЛДЫҚОРҒАН.