Сурет: gov.kz
Мәдениет және ақпарат министрлігінің Жастар және отбасы істері комитеті төрағасының орынбасары Біржан Әлімжанов сөз басында жастар саясатын іске асырудың негізгі бағыттары мен даму перспективалары туралы айтты. Оның айтуынша, жастар саясатының маңызды міндеті жастардың сапалы білім алуы мен кәсіби өсуіне мүмкіндік беріп, жағдай жасау қажет.
Өз кезегінде «Жастар» ғылыми-зерттеу орталығының директоры Айсұлу Ерниязова бүгінгі жастар саясаттың объектісі ғана емес, елдің трансформациясына елеулі үлес қоса алатын белсенді субъектісі болып отырғанын алға тартты. Оның пікірінше, жастар арасында бұрын зерттелмеген үрдістерді анықтайтын пәнаралық зерттеулер жүргізу маңызды. Бұл олардың құзыреттерін дамытуға, бәсекеге қабілеттілігін арттыруға және өздерін жүзеге асыруға қолайлы жағдай жасауға ықпал етпек.
Зерттеуші, PhD Эльмира Отар білім сапасын жақсартуға ықпал ететін ресурстарды неғұрлым тең және қолжетімді бөлуге жағдай жасаудың маңызына тоқталды. Бұған оқытудың инновациялық тәсілдерін енгізу, білім беру мекемелерінің материалдық-техникалық базасын жақсарту және цифрлық технологияларды дамыту кіреді.
Сондай-ақ «Eurasian Resources Group» компаниясының жастар саясаты жөніндегі менеджері Ильяс Құдабаев жастардың мансаптық таңдаулары мен олардың кәсіби бағдарын анықтайтын факторларды ескеру қажеттігін айтты.
«Студенттердің шамамен 30%-ы алдағы бірнеше жылда бір компанияда жұмыс істегісі келетінін білдірсе, төрттен бірі жеке бизнесін ашуды жоспарлайды. Мамандығына сәйкес жұмыс істеуден бас тартудың басты себептері – жұмыс процесінің монотондығы, кәсіби қызығушылықтың төмендігі және еңбекақының аздығы», деп атап өтті ол.
Ал MIND ғылыми-талдау орталығының сыртқы саясат және халықаралық зерттеулер бағдарламасының жетекшісі Мирас Жиенбаев мемлекеттің сыртқы даму стратегиясын қалыптастырудағы жастардың рөліне назар аударды. Оның айтуынша, жастар жаңа көзқарасқа, инновациялық ойлауға және жаһандық трендтер туралы терең білімге ие бола отырып, сыртқы саясатқа тиімді тәсілдерді әзірлеуге айтарлықтай үлес қоса алады.
Талқылауға қатысқан жастар мен сарапшылар замандастарының болашаққа деген көзқарасы мен олардың белсенді қатысуының маңыздылығын атап өтті. Олардың ой-пікірі бір арнаға тоғысты. Айтуынша, жастар саясаты саласында тиімді шешімдер әзірлеу үшін осындай сараптамалық талқылаулардың санын арттыру қажеттігін қолдап, оң пікірлерін білдірді.
