Мәселен, Жылыой аудандық полиция бөлімінің қызметкерлері 25 жастағы күдіктіні ұстады. Ол Ақкиізтоғай ауылында 14 мәрте ұрлық жасап, 34 ірі қараны жымқырған. Күдіктінің заңсыз әрекетінен мал иелеріне 5 млн теңге шығын келген.
«Жедел іздестіру іс-шарасы кезінде мал ұрлығына қатысы бар деген күдікті ұстады. Күдікті – Құлсары қаласының тұрғыны. Бұған дейін ұрлық жасағаны үшін қылмыстық жауапкершілікке тартылған. Ұсталған күдікті ұрлаған ірі қараны сату үшін әлеуметтік желіге хабарландыру жариялап отырған. Ұрланған малды сатып алған тұрғындар да анықталды», деп хабарлады полиция департаментінің баспасөз қызметі.
Тінту жүргізу кезінде күдіктінің мобильді телефонынан ұрланған малдың фотосуреттері мен сатып алушылар арасындағы жазбалар табылды. Күдікті кінәсін мойындап отыр. Қазір күдікті қамауға алынды. Полиция қызметкерлері қосымша дәлелдер жинау үшін телефон қоңырауларының биллингісін тексеріп жатыр. Мал ұрлығына басқа да адамдардың қатысының бар-жоғын тексеру қолға алынды.
Ал Қызылқоға аудандық сотында 13 жәбірленушінің малын ұрлап, 6,9 млн теңге шығын келтірген ер адамға қатысты іс қаралды. Ол да бөтеннің малын жасырын түрде бірнеше рет жымқырған. Сол себептен оған Қылмыстық кодекстің 188-1-бабының 3-бөлігінің 1-тармағымен айып тағылған.
«Айыпталушы Қ. өзінің шаруа қожалығының аумағында бөтеннің бірнеше сиыры жайылып жүргенін көріп, пайдакүнемдік ниетпен жасырын жымқырған. Бұл ісін бірнеше рет қайталаған. Ұрлаған малды сатып, ақшасын өз қалауы бойынша жұмсаған. Оның кінәсі өзінің және жәбірленушілердің жауаптарымен, қылмыстық іс материалдарымен дәлелденді», деп мәлімдеді аудандық соттан.
Аталған істе бір жайтқа назар аударылды. Бұл – сотталушының қылмыс жасаған кезде бұрынғы ұрлығы үшін пробациялық бақылауда жүргені.
Осыған байланысты прокурор айыпталушыға жаза тағайындау кезінде екі бапты қолдануды ұсынды. Біріншісі – айып тағылған баппен мүлкін тәркілеусіз, 6 жылға бас бостандығынан айыру. Ал екіншісі – Қылмыстық кодекстің 60-бабының 1-бөлігі негізінде бұрынғы үкім бойынша жазасының өтелмеген бөлігін ішінара қосу арқылы түпкілікті 7 жыл мерзімге бас бостандығынан айыру жазасын тағайындау.
Мүйізді ірі қарасы ұрланған жәбірленушілердің бірқатары қатаң жаза тағайындауды сұрады. Кейбірі жаза тағайындау мәселесін соттың құзырына қалдырды.
Жаза тағайындау кезінде бірнеше жайт ескерілді. Біріншіден, сотталушы кінәсін мойындап, өкінішін білдірген. Екіншіден, оның жас балалары бар. Міне, осындай себептер жазаны жеңілдететін мән-жайлар ретінде қаралды. Алайда сотталушы төтенше жағдай кезінде қылмыстық құқық бұзушылық жасағаны ескерусіз қалмады. Ал бұл – жазаны ауырлататын мән-жай.
«Сот үкімімен айыпталушы Қ. Қылмыстық кодексінің 188-1-бабының 3-бөлігінің 1-тармағымен кінәлі деп танылды. Оған 60-баптың 1-бөлігімен түпкілікті 7 жыл мерзімге бас бостандығынан айыру жазасы тағайындалды», деп мәлімдеді аудандық соттан.
Атырау облысы
