Өңірлік бөлімшелер саны 87-ден 28-ге дейін қысқартылып, негізгі қызметтердің жұмысын күшейтуге мүмкіндік берді. Цифрландыру бойынша вице-министр лауазымы енгізілді, сонымен қатар Республикалық жедел штаб жаңғыртылды.
Өртпен күреске ерекше назар аударылып жатыр. 2024 жылы 324 табиғи өрт тіркелді. Бұл 2023 жылмен салыстырғанда (868 өрт) 2,6 есе аз. Қарағанды, Ақмола, Қостанай облыстарындағы ормандарда өртті ерте анықтау жүйесін енгізу ормандағы өрт аумағын айтарлықтай азайтуға ықпал етті.
Құтқарушылардың жұмыс жағдайын жақсарту мақсатында техника мен жабдықтарды жаңарту жұмыстары жалғасып жатыр. Қостанай облысында құтқарушылардың қызметтік киімдерін жақсарту бойынша қанатқақты жоба іске қосылып, оң нәтиже көрсетті. Азаматтық қорғаныстың жаңа әскери бөлімдерін құру, оның ішінде тез құрастырылатын конструкциялардан өрт сөндіру деполарын салу бойынша жұмыс жүргізіліп жатыр. Бірінші жоба 2024 жылы Астанада 3,5 ай ішінде іске асырылды.
Сондай-ақ Қазақстанның батыс аймағында ТЖ жедел әрекет етуді қамтамасыз ету үшін «Теңіз жасағы» атты жасақ құру маңызды қадам болды. Алматы, Орал, Өскемен, Қостанай қалаларында құтқару батальондары қайта орналастырылды. Бұл жедел қамтуды кеңейтіп, күштер мен құралдарды тасымалдауға кететін шығындарды қысқартуға мүмкіндік берді.
Осы жылдан бастап Қазақстан төтенше жағдайларға әрекет ету жүйесін жетілдіруді күшейтті. Биыл «112» Бірыңғай кезекші-диспетчерлік қызметінің пультіне халықтан 4,7 миллионнан аса қоңырау түсті. ТЖМ күштерімен 14 мыңнан аса адам құтқарылды, 66,5 мың адам эвакуацияланды, 8 мың зардап шеккен адамға медициналық-психологиялық көмек көрсетілді. Сонымен қатар 83,3 мыңнан аса шұғыл шақыртуға шықты. Мұның 10 мыңы – өрт оқиғасы, 19 мыңға жуығы апаттық-құтқару жұмысы.
Іздеу-құтқару жұмысына, оның ішінде әуе кемелерін қолдануға ерекше назар аударылды. 2024 жылы «Қазавиақұтқару» АҚ әуе кемелері 2,5 мыңнан аса тапсырыс орындады. Мұның 395-і санитарлық авиация және 356 науқас тасымалданды.
ТЖМ жұмысындағы маңызды бағыттардың бірі – төтенше жағдайлардың алдын алу жүйесін дамыту. 2024 жылы су айдындарындағы жағдайды анықтау және бақылау мақсатында геоақпараттық жүйелер мен ұшқышсыз ұшу аппараттарын қолдана отырып, мониторинг жүйесін жаңғырту жұмысы жалғасты. Сонымен қатар ТЖМ мен ІІМ ведомстволық желілерін біріктіретін республикалық жедел цифрлық радиобайланыс жүйесі енгізілді. Бұл төтенше жағдайларға жедел және тиімді әрекет ету үшін үйлесімділік деңгейін айтарлықтай арттырды.
Өндірістегі бұзушылықтарды, апаттарды, оқиғаларды және жазатайым жағдайларды азайту мақсатында елде 2030 жылға дейінгі қауіпсіз еңбек тұжырымдамасы бекітілді.
Елдегі сейсмикалық қауіпсіздікті қамтамасыз ету мақсатында 2028 жылға дейін сейсмология саласын дамыту бойынша кешенді жоспар бекітілді.
Елдің 14 өңірінде су тасқыны кезеңінде 120 мың адам, оның ішінде 354 мүмкіндігі шектеулі адам және 45 мыңнан аса бала құтқарылып, эвакуацияланды. 2024 жылы елімізде ТЖ саны 2023 жылмен салыстырғанда 1,7%-ға азайды, ал зардап шеккендер саны 10,8%-ға төмендеп, 2023 жылғы 1 751 адамнан 2024 жылы 1 562 адамға дейін қысқарды.
