Өнер сайысы араб мемлекеттері аумағын жағалай жүзіп жүретін алып кемеде ұйымдастырылды. Байқаудан қалың көрермен де, оған қатысқан жас өнерпаздар да айрықша әсер алды. Ал бала кезінен тыңдарманын өзіндік өнерімен тамсандырып жүрген Ержан Максимге қазылар алқасы жоғары бағасын берді.
«Қазақстаннан 36 адам келген едік. Халық әні «Айқаракөзді» айтқаныма қуаныштымын. Ең сүйікті әндерімнің бірі болды. Осы конкурсқа қатысу үшін үлкен қолдау көрсеткен компанияға рақмет айтамын», дейді байқаудың бас жүлдегері Ержан Максим.
Оралдық өрен бұған дейін Ресейде өткен «Голос. Дети» халықаралық ән сайысында жеңіс тұғырынан көрінген еді. Бала кезінде-ақ талайды таңғалдырып, бірнеше бәйгеде оза шапқан. Десе де, Санремо байқауындағы бас жүлде оның жетістігін еселеп қана қоймай, әлемге танылуына сеп болды.
Ержан қазір Астанадағы Ұлттық өнер университетінде білім алып жүр. Студент болса да бірқатар продюсерлік орталықтан әріптестік жөнінде шақырту алған. Енді ол ұсыныстарды қарастырып, шығармашылығын одан әрі шыңдауға ден қояды.
