Суреттерді түсірген – автор
Айтты-айтпады, қауіп туралы ескерту, шектеулерге қарамастан жолға шығып кететін жүргізушілер аз емес. Сондықтан да ғой, Өскемен-Алтай бағытындағы қауіпті жолда көшкін жүріп, қырық шақты көлік кептеліп қалған. Әйтеуір, жолаушылар аман.
– Қардың шамадан тыс жауып, көшкін жүру қаупі туралы ескертулерге қарамастан, облыс тұрғындары алыс сапарларға шығып, жолдың күрделі учаскелерінде бөгеліп қалған, – деп хабарлайды ШҚО ПД баспасөз хатшысы Гүлнұр Түсіпова.
Полиция қызметкерлері жергілікті билікпен бірлесіп, туындаған қиын жағдайда жолаушылар мен жүргізушілерге жедел көмек көрсетті. Жылыну пунктері ашылып, жолаушылар сонда жеткізілді. Оқиға орнында арнайы көмекке мұқтаж жандар үшін медициналық бригадалар кезекшілігі құрылған.
Жолаушылар күн райы жақсарып, тасжол ашылған соң ғана бағыттарын жалғастырды. Айта кету керек, боран-шашынды күндері шектеулердің болып тұруы әбден мүмкін. Тек, соған құлақ асу керек. Әйтпесе, қолданылатын жаза да бар. Ол туралы құқық қорғау органдары жүргізушілер есіне жиі салып жүр.
– «Осинов» асуы мен Алтай және Серебрянск сияқты жақын жердегі елді мекендерде 30 төсектік орынмен жабдықталған жылыту пункттері жұмыс істеп тұр. Ол жерде тамақ әзірлеуге керекті құрал-жабдықтың бәрі бар. Ауызсумен де қамтылған. Іші жылы, жайлы. Жолда қалған жолаушылар саны көбейген жағдайда қосымша тағы 10 төсектік орынға да есептеуге болады, – деді Алтай ауданы полиция бөлімі бастығының міндетін атқарушы Денис Еримбесов.
Жылыту пунктінде жасалған жағдай туралы Ресейдің сонау Новосибирскі қаласынан келе жатқан жолаушы да айтып, таңданды. Қызметкерлер қонақ күткендей күтіп алды деседі.
– Ауылға, ата-анама қарай жолға шыққанмын. Алдын ала көшкін жүру қаупіне байланысты жол жабық деген хабарлама алғаныммен, өтіп үлгеретін шығармыз дедік. Алайда бізді полиция қызметкерлері тоқтатып, жолдың ашылғанын күту керектігін айтты. Сөйтіп, жылыту бекетіне орналастық, – дейді Сергей Семенов.
Жылыту бекеті жұмыс істеп тұрғанымен, табиғаттың тылсым күшін де естен шығармаған абзал. Боранды күні бекетке жетіп жығылатыныңызға ешқандай кепілдік жоқ. Яғни арнайы мамандардың ескертулерін ескеріп, шектеулерге құлақ асқан жөн. Ол деген – сіздің қауіпсіздігіңіз.
Шығыс Қазақстан облысы
