Көпшілікке мәлім, Атбасар ауданындағы еңбекші азаматтардың көбі нәсібін теміржолдан табады. Соның бірі – Атбасар электровоз жөндеу зауытының қарапайым жұмысшысы, адал еңбектен абырой тапқан атпал азамат Сағындық Оразұлы.
«Біздің Атбасар электр жөндеу зауытының тарихы өткен ғасырдың қырқыншы жылдарынан, паровоз депосы жұмыс істей бастаған кезден басталады. Бүгінде «Қамқор Локомотив» ЖШС-ның «Атбасар электровоз жөндеу зауыты» филиалы – ВЛ80, ВЛ40М сериялы электровоздарға күрделі жөндеу, техникалық қызмет көрсетуді, қызмет ету мерзімін ұзарта отырып, электровоздардың жылжымалы құрамын жаңғыртуды, оларға қосалқы бөлшектер өндіруді орындайтын ірі кәсіпорын. Зауытта өндіріс үдерісін жақсарту, кәсіпорынның бәсекеге қабілеттілігін арттыру жолында, жаңа технологиялар мен жұмыс әдістерін батыл енгізе отырып, кәсіпқойлық пен шеберліктің жоғары деңгейін көрсетіп жүрген мыңнан астам адам жұмыс істейді. Өнім сапасын жақсарту мақсатында 2006 жылы электровоздарды жуу және бояу цехы, 2009 жылы локомотивтерді жаңғырту цехы пайдалануға берілді», дейді ол.
Маманның айтуынша, 2017 жылы күрделі жөндеуден өткен Атбасар электровоз жөндеу зауыты – еліміздегі ең қуатты локомотив жөндеу кәсіпорны.
«Сағындық Оразұлы – тәжірибесі мол, әріптестері арасында, зауыт басшылығы алдында беделге ие кәнігі маман. Өз жұмысына өте ұқыпты, жоғары жауапкершілікпен қарайды. Электровоздардың автотежегіш жабдықтар жүйесін толық игерген санаулы шебердің бірі. Оның ВЛ80, 40 СК/ТК, ВЛ11 сериялы электровоздарды жөндеудегі біліктілігі жас мамандарға үлгі. Бұл іс-шаралар электровоздардың жұмыс істеу мерзімін ұзартуды қамтамасыз етеді, сол арқылы еліміздегі теміржол саласын дамытуға лепті үлесін қосады», дейді Атбасар электровоз жөндеу зауытының үйлестірушісі Бауыржан Балғазин.
