Фото: Ерлан Омар
Ең алдымен Президент кеңесшісі Бауыржан Омаров екі газеттің 105 жылдық мерейтойына арналған Қасым-Жомарт Тоқаевтың құттықтау хатын жеткізді.
«Алғашқы саны жарық көргеннен бастап қос басылым елімізді өркендету және берекелі бірлігімізді нығайту ісіне өлшеусіз үлес қосып келеді. Қазақтың біртуар перзенттері негізін қалаған газеттерде ойы ұшқыр сөз зергерлері қызмет етті. Олар халықтың сөзін сөйлеп, ұлт мәселесін бәрінен биік қойды. Ғасырдан астам уақыт ішінде бұл ақпарат құралдары қазақ журналистикасының қара шаңырағына айналды. Жасампаз істердің жаршысы оқырман қауымның рухани шамшырағы ретінде танылды. Бүгінде бұл басылымдардың қызметкерлері аға буын салған сара жолды лайықты жалғастырып келеді. Сіздер ұлттың жаңа сапасын қалыптастыру жолында қажырлы еңбек етіп жүрсіздер. Алдағы уақытта да шынайы ақпарат пен сапалы сараптаманы басшылыққа алып, өз міндеттеріңізді абыроймен атқара бересіздер деп сенемін. Баршаңызға ризашылығымды білдіремін және бақ-береке, толайым табыс тілеймін!», делінген Президент құттықтауында.
Дөңгелек үстел барысында ұлттық баспасөздің, оның ішінде «Egemen Qazaqstan» мен «Казахстанская правда» басылымдарының қоғамдағы орны, ақпарат айдынындағы әлеуеті және олардың ұлттық мүддені қорғаудағы маңызы талқыға салынды.
Белгілі журналист Сауытбек Абдрахманов саладағы жаңа бастамалар мен реформалар туралы ойын ортаға салды. Газет оқырмандарының санын арттыру үшін жан-жақты жұмыс жүргізу қажеттілігін жеткізді.
«Экономикалық тұрғыдан тиімсіз болғанымен, ұлттық басылымдарға мемлекет тарапынан қолдау көрсетілуі керек. Себебі газет – ұлт руханиятының алтын ұстыны», деді С. Абдрахманов.
Ардагер журналист Жанат Елшібек қазақ баспасөзінің даму үдерісі туралы сөз сөйлеп, бүгінгі күннің журналисіне қажет қабілеттер туралы пікірін білдірді. Газет шығару барысында алдыңғы толқын ағалар мен кейінгі толқын інілердің сабақтастығы мен рухани байланысының маңыздылығын атап өтті.
Сонымен қатар журналистер Қасым-Жомарт Тоқаевтың сұхбатында айтылған «Азаматтардың жасампаздық әлеуетін арттыру үшін пайдалы инвестиция» жасау мәселесін талқыға салды. Мемлекеттің тұтастығы мен рухани бірлігін қалыптастырудағы БАҚ өкілдерінің маңызы жөнінде ой қозғады.
Жиын соңында тәуелсіздіктің рәмізіндей болған қос басылым «Egemen Qazaqstan» мен «Казахстанская правда» газеттерінің ардагерлері қызметтегі әріптестеріне естеліктерін айтып, ақ жол тіледі.
