Суретті түсірген – Жұмабай МҰСАБЕК
Кәсіпорын «Қорғас-Шығыс қақпасы» арнайы экономикалық аймағында орналасады. Жел генераторлары зауытының өндірістік қуаты – жылына 2 ГВт генерация. Энергияны жинақтау жүйелерін шығару қуаты – жылына 1 ГВт. Жобаға 40 млн доллар инвестиция салынған. Кешен еліміздегі «жасыл» энергетиканың дамуына, экологияның жақсаруына және жалпы экономикалық дамуға оң әсер етпек.
Инвестициялық жобаны «Қазақстандық коммуналдық жүйелер» ЖШС мен қытайлық «Envision Energy» компаниясы бірлесіп іске асырады. Кәсіпорын жыл сайын жел генераторларының 250 жиынтығын және энергияны жинақтау жүйелерінің 100 жиынтығын шығармақ. Капсула салу рәсіміне қатысқан облыс әкімінің орынбасары Әсет Қанағатов өңірдің экономикалық өсуінің маңызды нүктелерінің бірі ретінде «Қорғас – Шығыс қақпасы» арнайы экономикалық аймағын дамытуға баса назар аударды.
«Қытайдан ТМД елдеріне, Еуропа мен Азияға шығатын маңызды бағыттардың қиылысында облыстың экономикалық өсу нүктесінің бірі Қорғас торабы орналасқан. Тораптың маңызды әрі инвесторлар үшін тартымды элементі – «Қорғас-Шығыс қақпасы» арнайы экономикалық аймағы. Бүгінде еркін экономикалық аймаққа қатысушылардың бірыңғай тізілімінде жалпы құны 907 млрд теңге болатын жобалары бар 68 қатысушы тіркелген. 2030 жылға дейін 47 жобаны іске асыру жоспарлануда. АЭА аумағында 51 млрд теңгеден астам сомаға 21 жоба іске асырылды. Жел генераторлары мен энергия жинақтау жүйелерін шығаратын заманауи зауыттың құрылысы – мемлекет пен бизнестің тиімді бірлескен жұмысының айқын нәтижесі», деді Ә.Қанағатов.
«Қазақстандық коммуналдық жүйелер» ЖШС бақылау кеңесінің төрағасы Дінмұхамет Идрисов кәсіпорынның іске қосылуы жел генераторлары мен энергия жинақтау жүйелерінің өндірісін жолға қоюға ғана емес, сонымен қатар заманауи технологияларды тартуға мүмкіндік береді дейді.
«Жобаны іске қосу импортқа тәуелділікті қысқартады, энергетикалық қауіпсіздікті нығайтады, жұмыс орындарын құрады, экспорттық мүмкіндікті кеңейтіп, төмен көміртекті экономикаға көшуді жеделдетеді. Өндірістің бастапқы кезеңінде отандық қамту үлесі 30% болады. Болашақта кезең-кезеңімен 90%-ға жеткізіледі», деді Д.Идрисов.
Кәсіпорын 2026 жылдың III тоқсанында іске қосылмақ. Өнімнің 60%-ы ішкі нарыққа, 40%-ы Орталық Азия мен Кавказ елдеріне экспортталады.
Жетісу облысы
