Фото: kursiv.media
Үкімет басшысы Қостанай облысында бидайды қайта өңдеу жобасы іске асырылып жатқанын айтты. Жалпы құны 132 млн. доллар болатын зауыт крахмал өнімдері мен биоэтанол шығарады. Биыл Түркістан облысында жобалық қуаты 150 мың тоннаны құрайтын жүгері өңдеу зауыты да іске қосылмақ.
«Астанада өндірістік қуаты 320 мың тоннаға жететін крахмал, глютен және жеміс шырынын терең өңдеуге арналған бидай мен бұршақ дақылдарын қайта өңдеу зауытын салу жобасы басталды. Биыл Солтүстік Қазақстан облысында тәулігіне 1200 тонна күнбағыс өңдейтін зауыт ашылады», деді Олжас Бектенов баяндамасында.
Премьер - министрдің айтуынша, бірнеше инвесторға өндірістік қарасора өсіруге рұқсат берілген.
«Бірнеше компанияға жасанды жағдайда қарасора өсіруге лицензия берілді. Аталған өнімнен май, мал азығын, тыңайтқыштар және талшық алуға болады», деді ол.
Биыл көлік-логистика саласында да жүзеге асырылатын жобалар таныстырылды. Мәселен, «Достық-Мойынты» және Алматы қаласын айналып өтетін теміржол құрылысы аяқталады.
«Дарбаза-Мақтаарал» және «Бақты-Аягөз» теміржол магистралін салу жалғасуда. «Мойынты-Қызылжар» жаңа теміржол желісін, сондай-ақ, «Алтынкөл-Жетіген» учаскесінің екінші жолдарын салуды қарастырып жатырмыз», деді Үкімет басшысы.
Еліміздің туристік әлеуетін арттыру мақсатында Катонқарағай, Зайсан және Кендірлі аймақтарында әуежай салынбақ. Олжас Бектенов баяндамасында Ақтауда әуе хабын құру жобасы пысықталып, Каспий теңізінің түбімен талшықты-оптикалық байланыс желісін тарту басталатынын атап өтті.
