Сурет: baq.kz
Павлодардан жылына 150 мың тоннадай тұрмыстық қалдық шығады. Оны сұрыптап, өңдейтін зауыт таяу уақытта салынып бітуі мүмкін. Оған дейін тұрғындарды тұрмыстық қалдықтарды бөліп жинауға дағдыландыру көзделіп отыр.
– Үй маңындағы контейнерлер қоқысты сұрыптап жинау мәселесін шешпейді. Тұрмыстық қалдықты үйде бөлектеп жинау қажет. Азаматтар қоқыстың барлығын бір ғана ыдыста сақтап, сол қалпымен контейнерге апарып төгеді. Жалпы, үйдегі мұндай ыдыс төрт бөліктен тұрса дұрыс болар еді. Бірақ бізде әзірге мұндай экологиялық сана қалыптасқан жоқ әрі оны талап ету де ерте. Сондықтан сұрыптауды алдымен кәсіпорындарда, қоғамдық тамақтану орындары мен өзге де ұйымдарда жүргізу керек. Мәселен, оларда шыныға, пластикке, қағазға, биологиялық қалдықтарға арналған контейнерлер қойылғаны дұрыс, – дейді Павлодар облысының әкімі Асайын Байханов.
Әкім өңірде қалдық өңдейтін зауыт ашылса, жыл сайын тонналап жиналып қалатын қоқыстардың мәселесін шешуге болады деп есептейді. Биологиялық қалдықтардан биогумус өндіруге болар еді. Зауыт оған қоса қалдықтан металды, шыны мен қағазды бөліп алып шығаруға мүмкіндік береді.
Облыстағы коммерциялық кәсіпорындар қоқысты сұрыптап жинауға кірісе бастады. Әуелі металлургиялық ірі кәсіпорындар, одан соң қоғамдық тамақтану орындары мен супермаркеттер, дүкендер көшеді. Соңынан қала тұрғындарына үйрету көзделіп отыр. Болашақта тұрғындарды бұл тұрғыда ынталандыру да ойда бар. Мәселен, қалдықты бөлек жинағандар қоқысты шығару қызметіне жеңілдікпен төлем жасауы мүмкін.
Атап өту керек, Павлодар қаласының аулаларындағы контейнерлерден күніне мыңдаған тонна қоқыс жиналады. Билік тұрмыстық қатты қалдықтарды сұрыптап, жинау тәсіліне көшуді ойға алғалы бірнеше жылдың жүзі болды. Қалдықтар төгілетін полигонда арнайы зауыт құру жобасы басталып та кеткен. Шаһарда ескі қоқыс контейнерлерін еуроконтейнерлерге ауыстыру жобасы жалғасып жатыр.
Құрылып жатқан қоқыс өңдеу зауытында болашақта түсті, қара металдар, картон, полиэтилен, пластик қалдықтары, резеңке, ағаш, тоқыма-мата өнімдері, шыны қалдықтары жеке-жеке жиналады.
Павлодар облысы
