Мейрамбекпен қазіргі Әл-Фараби атындағы Қазақ ұлттық университетінің Журналистика факультетінде бірге білім алдық. Жақсы оқып қана қоймай, жарасымды әзіл-қалжыңы таусылмай, курстастарды күлкіге кенелтіп жүретін ақжарқын мінезімен ерекшеленді. Студенттік той-томалағымызда асабалық етіп, ортамыздың көркі болды. Сол кезден-ақ тума дарыны, биік парасаты, жылы да шыншыл сөзімен жұртты аузына қаратып, жанына тарта білетін ұйымдастырушылық қабілеті аңғарылып, келешегінен үлкен үміт күттіретін.
Мейрамбектің өмір жолы тақтайдай түзу һәм жеңіл болған жоқ. Орта мектепті тәмамдаған соң ауылда бір жарым жылдан астам құрылысшы болып еңбек етті. Себебі кеңес заманында республикамыздағы жалғыз журналистика факультетінің күндізгі бөліміне оқуға бірден түсу он шақты талапкердің біреуіне ғана бұйыратын бақыт еді. Сондықтан Мейрамбектің әуелі даярлық бөліміне түсуіне тура келді. Ал кейінгі журналистік қызметінде шындықты айтамын деп, маңдайы тасқа соғылған сәті де болды... Бірақ, «алмас қылыш қын түбінде жатпай», жарқ етіп, курстастарымыздың ішінде ең жоғары лауазымды қызметтерге тағайындалды. Жамбыл облысы әкімінің әлеуметтік мәселелер жөніндегі орынбасары болып, туған өңірінің өркендеуіне аянбай атсалысты. «Jambyl» телеарнасының директоры кезінде талай бұлақтың көзін ашқандай іс тындырды – дарынды жастарды жұмысқа алып, оларға тәлімгер болды. Облыс кәсіподақтары аумақтық бірлестігінің төрағасы ретінде қарапайым еңбеккерлердің құқықтарын қорғауға жанын салды. Алтыншы шақырылымдағы Жамбыл облыстық мәслихатының және жетінші шақырылымдағы Парламент Мәжілісінің депутаты болып сайланып, ел мен жер, тіл мен діл тағдырына қатысты көкейкесті мәселелерді көтерді. Оның «Жамбыл облысының құрметті азаматы» атанғандығы – туған өңіріне сіңірген елеулі еңбегіне жерлестері тарапынан берілген әділ де лайықты баға.
Мейрамбек Төлепберген – еліміздің таңдаулы журналистері шоғырынан өз орнын алған, есімі қазақ журналистикасының тарихына енген қаламгер. Шығармашылық жұмысын спорт тақырыбынан бастап, Орталық Азия және Қазақстан спорт журналистерінің Халықаралық байқауының бас жүлдесіне ие болды. «Халық кеңесі» және «Egemen Qazaqstan» республикалық газеттерінде жауапты қызметтер атқарып, саяси-әлеуметтік мәселелерге арналған публицистикалық мақалаларымен кеңінен танылды. «Ерен еңбегі үшін» медалімен марапатталып, «Қазақстанның еңбек сіңірген қайраткері», Президент грантының иегері, Журналистер одағы сыйлығының лауреаты атанды.
Мейрамбек халқымыздың сүйікті ұлы, жақсы ағаларға жақсы іні, кейінгі толқынға жанашыр аға, сенімді дос, асыл жар, ардақты әке бола білген біртуар азамат еді. Жүзінен нұр төгілген жарқын бейнесі жадымыздан өшпейді.
Кәрібай МҰСЫРМАН
