DosAI – пайдаланушыларға кітапханалық қызметті жаңа деңгейде ұсынатын цифрлық көмекші. Ол кітапхана оқырмандарына ақпараттық қолдау көрсетіп, қажетті әдебиеттерді таңдауға көмектеседі, кітапхана ресурстары туралы жылдам әрі нақты мәлімет береді.
Іс-шарада жоба әзірлеушісі кітапхананың белсенді волонтері әрі тәжірибеден өтуші, Өскемен экономика және техника колледжінің студенті Денис Кушнарев жиналған қауымды нейро-ассистенттің жұмысымен толық таныстырды.
Қатысушылар DosAI-дың мүмкіндіктерін өздері байқап көріп, кітапхана кеңесшілерінің көмегімен тестілеуден өткізді. Нейро-ассистенттің тиімділігі мен қолайлылығына көз жеткізген қонақтар жаңа технологияның кітапхана қызметін заманауи әрі қолжетімді етудегі маңызын ерекше атап өтті.
DosAI – кітапхана оқырмандарының сенімді көмекшісі7 Цифрлық ассистент А.С. Пушкин атындағы облыстық кітапхананың негізгі сайтына (www.pushkinlibrary.kz) біріктірілген. DosAI кітапханаға келушілерге:
- Кітапхана жұмысының тәртібі жайлы ақпарат береді.
- Оқырман билетін алу жолдарын түсіндіреді.
- Өтетін іс-шаралар мен көрмелер туралы хабарлайды.
- Үйірмелер мен клубтардың қызметі жайлы ақпарат береді.
- Өлкетану бағытындағы материалдарды іздеуге көмектеседі.
- Оқырман талғамын саралап, кітап таңдауға жәрдемдесу сияқты көптеген қызмет түрлерін ұсынады.
А.С. Пушкин атындағы облыстық кітапхана директоры Назым Ерназарқызы жаңа жүйенің мүмкіндіктеріне ерекше тоқталды.
«Кітапхананың нейро-ассистенті оқырмандарымыз үшін таптырмас көмекші болмақ. Бұл – пайдаланушылармен өзара байланысты барынша ыңғайлы әрі тиімді етіп, кітапхана ресурстарына қолжетімділікті арттыруға мүмкіндік беретін инновациялық құрал. DosAI электрондық каталогтар мен ақпараттық ресурстарды ілгерілетуде маңызды рөл атқарады», деді Назым Ерназарқызы.
DosAI – Қазақстандағы кітапханалық қызметті цифрландырудағы маңызды қадам. Бұл жүйе оқырмандардың іздеген ақпаратын оңай әрі жылдам табуына көмектесіп, кітапхананың мүмкіндіктерін барынша тиімді пайдалануға жағдай жасайды.
