Кеше Астанада Демократиялық күштердің «Қазақстан-2050» жалпыұлттық коалициясының отырысы өтті. Онда жетекші саяси партиялардың төрағалары, үкіметтік емес ұйымдар мен азаматтық қоғам өкілдері Президент Нұрсұлтан Назарбаев айқындаған «100 нақты қадам» Ұлт жоспарын іске асыруға атсалысу мәселелерін талқылады.
Жиынды ашқан «Нұр Отан» партиясы Төрағасының бірінші орынбасары, коалиция төрағасы Бауыржан Байбек Мемлекет басшысы ұсынған реформалардың маңыздылығына тоқтала келіп:
– Қазіргі реформалар – егемен ел болғаннан бері жүзеге асқан іргелі істердің заңды жалғасы. Мемлекет пен қоғам дамуының келесі жарқын кезеңіне өту алдында қарқынымызға қарқын қосатын, Қазақстанды әлемнің ең дамыған 30 елінің қатарына енгізер нақты шаралар кешені, – деді.
Оның сөзіне қарағанда, мұндай келелі шараларды азаматтық қоғамның атсалысуынсыз жүзеге асыру мүмкін емес. Елбасы «демократиялық қоғамның ажырамас бөлшегі» деп атаған азаматтық қоғам институттарына осынау ауқымды реформаларды іске асыруда аса үлкен жауапкершілік артылады.
Бұдан бөлек, Бауыржан Байбек еліміздің алдына – «Баршаға ортақ қазіргі заманғы мемлекет», «Заңның үстемдігін қамтамасыз ету», «Тұрақты экономика», «Болашағы біртұтас ұлт», «Транспаренттік және есепті мемлекет» сияқты бес институттық реформаны жүргізу бойынша ауқымды міндеттер қойылып отырғанын, 2015 жылғы 20 мамырда «Мемлекеттік құрылыстың алдағы 100 нақты қадамы» атты Ұлт жоспары ұсынылғанын, бұл құжат халықаралық сарапшылар тарапынан жоғары бағаланғанын, олар Қазақстанның әлемдегі ең беделді бағдарламаларының бірінен бастау алғанын атап көрсеткенін жеткізді.
Сондай-ақ, ол «Нұр Отан» партиясының бес институттық реформа шеңберінде Ұлт жоспарын жүзеге асыру бойынша ұсыныстардың ауқымды пакеті дайындалғанын мәлім етті. Оның айтуынша, бұл ұсыныстар өткен аптада «Нұр Отан» партиясының қоғамдық саясат институты мен Медиалық технологиялар орталығы құрған «Sarap Time» сараптама клубы алаңында талқыланған.
Бұған қоса, Б.Байбек Ұлт жоспарын жүзеге асыруда түпкілікті көзделіп отырған мақсатымыздың мәнісін түсіндіре кетті.
– Елбасы айтқандай, елде әділ сот пен құқық қорғау жүйесін, халыққа қызмет ететін мемлекеттік аппарат құру, экономикасы кемел, болашағы біртұтас ұлт болуға бағытталған реформаларды жүзеге асыру – қарапайым қазақстандықтардың қамы. Мақсат – мемлекетке деген азаматтар арасында айнымас сенім қалыптастыру, сол арқылы Мәңгілік Ел болудың даңғылына түсу, – деді.
Сонымен қатар, басқосуда белгілі болғандай, «Нұр Отан» партиясы құрған республикалық-қоғамдық штабқа коалиция мүшелерiнiң 90 пайызы кiрген. Бiр ай iшiнде олар көптеген аудандар мен ауылдарда, 20-дан астам iрi кәсіпорындарда болып, 70 мыңнан астам адаммен кездескен. Барлық қоғамдық бiрлестiктер елiмiздiң өркендеуi үшiн Елбасының жанына топтасып, өздерiнiң саяси мәдениеттерiнiң жоғары деңгейiн көрсете білген. Президенттің реформалары азаматтардың мемлекетке деген сенімiнiң арттырылуына, азаматтық бастамалар мен қоғамдық бақылауды кеңейтуге бағытталған.
Жиында айтылып өткендей, Мемлекет басшысының тапсырмасына сәйкес, ауқымды әкiмшiлiк реформа жүргiзiлiп, саяси қызметкерлердiң саны 8 есе қысқарған. Экономиканы жүйелi түрде дамытудың арқасында өңiрлердiң мүмкiндiктерi айтарлықтай ұлғайған. Осылайша, соңғы 10 жылда жергiлiктi бюджеттер 5 есе, орталықтың трансферттерi 8 есе артқан.
Басқосу барысында Ұлттық экономика министрі Ерболат Досаев, Мәжіліс депутаты Нұрлан Әбдіров және жетекші саяси партиялардың төрағалары, үкіметтік емес ұйымдар мен азаматтық қоғам өкілдері, сарапшылар бес институттық реформа, «100 нақты қадам» Ұлт жоспары жөнінде ой-пікірлерін айтып, өздерін толғандырып жүрген ұсыныстарын жеткізді.
Отырыс соңында Демократиялық күштердің «Қазақстан-2050» жалпыұлттық коалициясы «100 нақты қадам» Ұлт жоспарын жүзеге асыруға қатысты Үндеу қабылдады.
Жолдыбай БАЗАР,
«Егемен Қазақстан».
