Фото: gov.kz
Алматы қаласы сейсмикалық белсенді аймақта орналасқан. Сондықтан қалада күшті жер сілкіністерін болжайтын және ерте хабарлайтын 28 станция жұмыс істейді. Ерболат Досаев кездесуде қосымша 70 станция орнату жоспарланып отырғанын айтты. Биыл 30 станция орнатылса, 2026 жылдың соңына дейін тағы 40 станция іске қосылмақ.
Алматы әкімі ҚХР Жер сілкіністері агенттігінің табиғи апаттар қаупін азайту бағытындағы жұмыстарымен танысып, Алматыда сейсмикалық қауіп-қатерді төмендету мәселесін талқылады. Ресми сапар қортындысында Қазақстанның сейсмологиялық байқау және зерттеулер ұлттық ғылыми орталығы мен Қытайдың Жер сілкіністері агенттігінің Геофизика институты арасында сейсмикалық мониторинг және ерте хабарлау жүйелерін біріктіру бойынша бірлескен жұмыс туралы келісімге қол қойылды. Бұл құжат екі ел мамандарына сейсмикалық ақпаратпен нақты уақыт режимінде алмасуға мүмкіндік береді.
«Халықты табиғи апаттар туралы алдын ала хабардар ету және олардың жер сілкінісіне дайындығын қамтамасыз ету – өзекті мәселенің бірі. Осыған байланысты CEA және Қытайдың Геофизика институтымен ынтымақтастық біз үшін өте маңызды», деді Ерболат Досаев.
Өз кезегінде ҚХР Жер сілкіністері агенттігінің президенті Ван Кунь сейсмикалық мониторинг пен ерте әрекет ету бойынша тәжірибе алмасу барысында жан-жақты қолдау көрсетілетінін атап өтті.
