Әдебиет мектебі – еліміздегі тұңғыш авторлық жоба. Мәселен, Оқу-ағарту министрлігінің тапсырмасы аясында оқушылар арасында ұлттың имунитетін көтеру мақсатында қазақ әдебиетінің алыптарына арналған республикалық түрлі жарыс өтеді. Бұл қатарда «Абай», «Махамбет», «Мағжан», «Ілияс» оқулары бар. Осындай байқауларға еліміздегі әр мектеп қатысуға міндетті. Сондықтан қазақ тілі мен әдебиеті пәнінің мамандары жанұшыра шәкірт іздейді. Былайша айтқанда, жоқтан бар жасайды. Тіпті кейбірі өлең мен эссесін өзі жазып беріп, болмаса біреуге ақы төлеп жаздырып алып, оқушыны қатыстырады. Мұндайда қазақтың «жетелеп қосқан тазы түлкі алмайды» деген мәтелі еске түседі. Оның үстіне ұстаздың өзі өлең-жырдың құрылымын білмегендіктен, оны біреуге үйретемін деуі де бос әурешілік. Сондықтан Жетісу облысы әкімдігінің қолдауымен елімізде тұңғыш рет ашылған «Мизам» жылжымалы әдебиет мектебінің маңызы зор. Аталған жоба аясында білікті қаламгерлер ауыл-ауылдарды аралап, шығармашылыққа құштар жастарға сабақ береді.
«Әдебиет мектебі шығармашылықтың жеті бағыты бойынша жұмыс істейді. Әуелі жас қаламгерлерді өлең, шағын әңгіме, мақала, эссе, шығарма жазуға машықтандырады. Поэзия, проза жанрында қалам тербеген жетісулық ақын-жазушылардың еңбегін насихаттай отырып, жеке жазу стилін қалыптастырады. Жас қаламгерлерді мемлекеттік мерекелер мен атаулы күндерде бірлесе жұмыс істеуге тарта отырып, олардың бойындағы отансүйгіштік қасиеттерін оятуға күш салады», дейді жоба лекторы, ақын Жұматай Әміреев.
Әдебиет мектебіне облыстағы шығармашылыққа қызығушылығы бар 6–10 сынып аралығындағы оқушылар қатыса алады. Көшпелі мектеп облыс қалаларын қоса есептегенде әр аудан орталығында бір апта сабақ өткізеді. Оқу курсында оқушылар жазу мәнері мен оқу әдебі бағытында екіге бөлініп, тәлімгерлермен бірлесе жұмыс істейді. Сабақ барысында үздік нәтиже көрсеткен оқушылар ақтық сынға арналған шығармашылық байқауға жолдама алады.
«Мұнда ауылдағы әдебиетке әуес оқушылар ақын-жазушыларды Талдықорғанға іздеп келмейді, керісінше, өңірдегі танымал қаламгерлер ауылда жүрген таланттарды өздері іздеп барады. Әдебиет мектебіне әр ауданнан 20 оқушы қабылданады. Оларға курсты толық аяқтағаны туралы сертификат табысталады. Жалпы, облыста 8 аудан, 2 қаланы қосқанда 200 баланы оқытуды жоспарлап отырмыз. Сабақ барысында үздік нәтиже көрсеткен оқушыларға облыс әкімдігінің арнайы сыйлығы бар», дейді мәдениет, архивтер және құжаттама басқармасының басшысы Қуаныш Сүлейменов.
Әдебиет әлеміне қадам басқан жастардың жолын туралап, қаламын ұштап, бағытын белгілеп беру көп жылдан бері ескерілмей келе жатқан дүние. Мектеп жасында жазушы, немесе ақын болуды армандаған талай бала жөн сілтер ұстаз болмаған соң өмірдегі жолын басқа жақтан тауып кетті. Енді осы олқылықтың орнын толтыруда «Мизам» әдеби мектебі іске кіріспек.
«Жылда облыстық «Дарын» орталығы қазақ әдебиетінің талантты өкілдеріне арнап байқаулар ұйымдастырады. Ауданға арнайы хат жолдап, ауыл-ауылдардан іріктеп әр аталым бойынша бір-бір оқушыдан әкелуді тапсырады. Облыстан берілген тапсырма болғандықтан әрі жас дарындарды анықтауға жол ашатындықтан аудандық білім бөлімі оқушы дайындауды мектеп әкімшілігіне жүктейді. Әрине, шығармашылыққа бейім оқушылар жоқ дей алмаймыз, бірақ оларға бағыт-бағдар беретін сол саланың жетекші маманы жетіспейді», дейді қазақ тілі мен әдебиеті пәнінің мұғалімі Рауан Мырзахмет.
Айта кетейік, одан бөлек үздік оқушылар арасында байқау алдында негізгі тәлімгерлерден бөлек, елге танымал, белсенді ақын-жазушылар қонақ дәріскер ретінде шеберлік сағатын өткізетін болады.
Жетісу облысы
