Коллажды жасаған – Қонысбай ШЕЖІМБАЙ, «EQ»
Бектібай Жылқыбаев 1941 жылы 16 маусымда Ресейдің Чкалов облысының Домбаровск ауданынан майданға аттанған. Ресейде дүниеге келіп, сол жақтан әскерге алынғандықтан да болар, бірнеше мемлекеттік марапат алған оғлан туралы қазақ баспасөзі көп жазбапты.
Біз сөз етіп отырған мақалада Бектібай Жылқыбаев майданға алғаш келгенде көпке дейін көңілі көншімей жүргені, мұның себебін сұрағандарға: «Әлі күнге дейін жаудың бір самолетін атып түсіре алғаным жоқ. Жұртқа не айтпақпын?», деген екен.
«Бір күні жаудың төрт самолеті біздің әскерлердің төбесіне шүйілді. Бектібай зеңбірегінің аузын төбеден төнген самолеттерге бұрып:
– Атыңдар! – деп команда берді. Зеңбірек күнше күркірей қалды. Жаудың алда келе жатқан самолеті кенет өртеніп, жанған бойы төмен құлдилады. Жылқыбаев оқтың бетін жаудың басқа самолетіне аударды. Совет зенитчигінің сыңайын таныған неміс самолеттері шұғыл бұрылып кері қайтты.
Жау самолеттері кеткен соң, Бектібай атып түсірілген «Мессершмидтің» Нева жағасында жанып жатқанын көрді. Көптен бері көңілінде түйткіл болып жүрген арманы орындалғандай болды», дейді автор.
Ұшақты жойған батырдың көңіліндегі түйткіл тарап, сенімі күшейіп, ширыға түскенге ұқсайды. Бірте-бірте Бектібай ұшақ атып түсірудің шеберіне айналған.
«Жаудың барлаушы самолеттері өткел үстінен ерсілі-қарсылы ұшып, айналсоқтап шықпай қойды. Немістердің таяу уақытта өткелді бомбалайтыны мәлім болды. Совет зенитчиктері көздерін көкке тігіп, мұқият бақылай бастады. Ертемен бір топ «Юнкерс» біздің бөлімшелердің үстіне түйілді. Жау самолетіне бірінші болып Жылқыбаев оқ атты. Оның атқан снарядтары жау самолетінің біріне тиді. Өртенген «Юнкерс» шыр көбелек айналып, төмен ақты. Міне, тағы да бір топ «Юнкерс» ұшып келеді. Олар ұшқан беттерімен батареяға шүйілді. Бірақ совет ерлерінің жаудырған оғына төтеп бере алмай, бытырай бастады. Шүйіліп бомба тастамақ болған бір «Юнкерсті» Жылқыбаев тағы да атып түсірді».
М.Козлов пен М.Осмоловский атты аға лейтенанттар жазған мақаланың соңында Бектібай жанып жатқан снарядтар жәшігін өшіріп, батырлығының арқасында бір зеңбіректі өрттен аман алып қалғанын, кейіннен сол зеңбірекпен тағы да фашистердің 8 ұшағын атып түсіргенін баяндаған.
Майдандағы ақтаңдақтардың жоқшысы болып жүрген «Атамның аманаты» қорының қызметкерлері арқылы аты-сойы қазаққа беймәлім болып келген Бектібай Жылқыбаев туралы мәліметтерді таптық.
Бектібай Жылқыбаев 1942 жылдың 1 қазанында жау әскерінің 5 ұшағын жойып, нәтижесінде, 189 ұшақтың шабуылын тоқтатып, «Қызыл жұлдыз» орденіне ұсынылыпты. Кейіпкеріміз ол марапатты алды ма, алмады ма, ол жағы белгісіз. Белгілісі, соғыс кезінде бас басылым мақала жариялаған батыр ел сенімін ақтап, арада бір жыл өткеннен кейін де әуе шайқастарын тойтарып, шеберлігі мен батырлығының арқасында немістердің бірнеше ұшағын атып түсіріпті. Демек қазақ Бектібай Жылқыбаев сынды батыры бар екенін ешқашан да ұмытпауға тиіс.
