Әуелі зауыттың кадр бөліміне Диляра Талғатқызы жұмысқа орналасыпты. Іс құжатына мығым жұдырықтай қыз өзіне тапсырылған шаруаны ширатып әкетеді. Бос жұмыс орындар жәрмеңкесіне үзбей барып, зауытқа жұмысшы мамандарды жинайды. Сөйтіп жүргенде Мирас Қанатұлы әлі ашыла қоймаған зауытқа құжатын өткізіпті. Содан алғашқылардың бірі болып Ташкенттегі тұрмыстық техника шығаратын жеті бірдей зауытта тағылымдамадан өтіп, тәжірибесін жетілдіреді.
Мирас – Қарағанды зерттеу университеті химия факультетінің үздік түлегі. Оқуын ойдағыдай бітірген соң отан алдындағы борышын өтеуге аттанды. Әскери сапта жүріп те өзін жан-жақты көрсете білген сарбаз түрлі оқу-жаттығу жиынында озық болды. Содан соң «AlsKazlab» сынақ зертханасына химик болып орналасты. Ондағы міндетін де мінсіз атқарды. Тағы да өзі білім алған университетке заңгер мамандығына қосымша оқуға түседі. Құқық қорғау саласында да еңбек етеді. Сөйтіп жүріп келіншегі Диляра екеуі кеңесіп, жаңа зауыттан жарқын болашақ іздейді. Қазір ол кәсіпорынның білдей бір жауапты маманы.
Мирастың қай істі болсын домалатып әкететін қабілеті бар. Соның арқасында аз уақыт ішінде оған асүй пешін құрастыратын цехты басқаруды сеніп тапсырады. Қазір оның цехында 25 жұмыскер бар. Асүй пешінің «Artel», «Shivaki», «Arg», «Apetito» брендімен 62 түрін құрастырады. Күніне 350-400 пеш әзірлейді. Оларды толық құрастырып, техникалық тексерістен жіті өткізіп, еш кедергісіз жұмыс істейтініне көз жеткізіп, қаптап, құжатын сәйкестендіріп, қоймаға жөнелтеді. Өндірістің ең үлкен бөлігіне жауапты маман жұмысшыларының шаруасын ұйымдастырып, жаңадан келген қызметкерлерді оқытып, қауіпсіздік шараларын қадағалайды. «Бастысы, өнімнің сапасы мен күнделікті жоспарды орындау», дейді ол.
Келіншегі Диляра да зауыттың отымен кіріп, күлімен шығатын білікті кадрдың бірі. Бүгінде еңбегі еленіп, кәсіпорын әкімшілігінің жауапты маманы болып тағайындалды. Серіктестіктің қоғам және мемлекеттік мекемелермен байланыс басқармасына жетекші болған Диляра Талғатқызының мойнындағы жауапкершілік орасан. Сырттан келген меймандарды қарсы алып, зауыт тіршілігімен таныстырудан басқа, іскерлік қағаз, құжаттармен дамыл таппайды.
«Біз осы зауыт ашылмас бұрын отау құрғанбыз. Еңбек етіп жүрген зауытымыздың өндірісі де өркен жайып, қанаты қатайып келеді. Күйеуім зауыттағы озат жұмысшының бірі. Зауытпен қатар қанат жайып келеміз. Осы жерде жүріп, жаңа баспанаға қол жеткіздік, жаңа көлік алдық. Басшылық еңбегімізді елеп, қызметімізді де жоғарылатып жатыр. Екі қызымыз бар. Олардың да оқу үлгерімі жақсы. Тәубе дейміз, барлығы еңбектің арқасы. Бастысы, күйеуім екеуміз үйде де, жұмыста да біргеміз», дейді Диляра.
Жұбайлар бос уақыттарын тиімді өткізеді. Үйінің жанындағы спорттық кешенде бірге жаттығады. Күнделікті шахмат ойнап, ойларын шынықтырады. Жас отау жақында жаңа шаңыраққа қоныс аударды. Отандық өнімді қолдап, пәтерлеріне өздері еңбек етіп жүрген «Silk Road Electronics» кәсіпорнынан электр тауарларын сатып алды. «Artel» брендімен теледидар, электрлі су жылытқыш, шаңсорғыш, асүй тоқпеші, ауасорғыш, кір жуатын машина, желдеткіш секілді тұрмыстық техника түрлерін қолданып отыр.
– Зауыт отбасымыз үшін берекелі болды. Кәсіпорынның келешегі зор. Бүгінде әлемдік нарыққа шықты. Жұмысшыларға барлық жағдайды қарастырған. Жоғары жалақы, үй мен жұмыс арасында автобуспен тасымалдау, тегін түскі ас, толық әлеуметтік пакет ұсынады. Тәжірибе толықтырып, білім арттырамын дегендерді арнайы оқытады. Онда да күнбе-күн жалақысы жүріп жатады. Зауытта әлі де бос жұмыс орындары бар, – дейді М.Қанатұлы.
Қарағанды облысы
