Коммуналдық шаруашылықты жаңғырту

«Былтыр энергетикалық және коммуналдық инфрақұрылымды жаңғыртуға арналған ұлттық жоба қабылданды. Бұл жоба аясында өнеркәсіп саласын дамыту үшін жаңа өнімдер шығару да қолға алынбақ. Отандық кәсіпорындар негізгі сұраныстың 40 пайызын ғана өтей алады», деді Мемлекет басшысы.

Жолдауды іске асыру шарала­рының бірі ретінде «Энер­ге­тикалық және коммуналдық секторларды жаңғырту» ұлттық жобасы қолға алынды. Вице-премьер Қанат Бозымбаев жобаны іске асыру жөніндегі жобалық кеңсенің алғашқы отырысында ұлттық жоба инфрақұрылымның тозу деңгейін төмендетуге, ком­муналдық қызметтерді үздіксіз ұсы­нуды қамтамасыз етуге ба­ғытталғанын айтқан болатын.

Қазір жылу, электр энергия­сы, сумен жабдықтау, су бұру салаларында қызмет көрсететін 87 монополист кәсіпорындағы энергетикалық, коммуналдық инфрақұрылымның тозу деңгейі 65%-дан 100%-ға дейін жеткен. Осыған байланысты жобалық кеңсеге инженерлік желілер тозуын 40%-ға дейін төмендету, электр энергиясын өндірудің жаңа көздерін (қосымша 7,3 ГВт) салу міндеті қойылды.

«2029 жылға дейін комму­налдық желілерді жаңғыр­туға инвестициялық қажеттілік 6,8 трлн теңгені, электр энергиясын өндіруге 6,2 трлн теңгені құрайды. Екінші деңгейлі банк­терден, ұлттық қаржылық даму институттарынан, халықара­лық қаржы ұйымдарынан қа­ра­жат тартылады. Табиғи монополия субъектілерін қар­жы­ландыру тетігін құру, жеңіл­­детілген қаржыландыруға немесе субсидиялауға өтінімдерді қарастыру «Бәйтерек» ҰБХ» АҚ-ға жүктелген. Жобалардың жүзеге асырылу барысына, құ­рылыс-монтаждау жұмыс­та­ры­на бақылау жүргізу «ТКШ Қаз­орталық» АҚ-ның құзыре­тіне бекітілген», деді Үкімет бас­шы­сының орынбасары.

Ұлттық жобада отандық өнер­кәсіптің дамуына ерекше назар аударылып, жұмыс істеп тұрған кәсіпорындарды 100% жүктеумен қатар, 27 жаңа өндіріс орындарын ашу, жұмыс орындарын құру жоспарланған. Өнеркәсіп және құрылыс министрлігіне отандық тауар өндірушілер өндіретін тауарлар, жұмыстар, қызмет­тер тізімін әзірлеу, жосықсыз қатысушылар тізімін енгізе отырып, сатып алудың бірыңғай электрондық нысанын енгізу тапсырылды.

Бұл ретте халықтың әлеу­меттік тұрғыдан осал санаттарын қолдау шаралары да жиі айтылып жүр. Төлем қабілеті бар топтар коммуналдық қызметтерді әділ, нарықтық тарифтер бойынша төлеуі керек. Осал санаттағылар тұрғын үй автоматтандырыл­ған жүйесі арқылы тарифтер­дің өсуінен қорғалуға тиіс дейді ­мамандар.

Энергетика және комму­налдық шаруашылық сала­сын­дағы проблемалар ең өзекті мәсе­­лелердің бірі, олар кешенді әрі жедел шешуді талап етеді. Ұлттық экономика министрлігі мүдделі мемлекеттік органдармен, ұйымдармен бірлесе отырып, Ұлттық жобаны іске асырудың Жол картасын әзірледі. Жобаны сәтті жүзеге асыруға министрліктер, әкімдіктер мен жеке сектордың өзара ынты­мақтастығы, сондай-ақ аза­маттардың белсенді қатысуы қажет.